Årsmelding Steinparkens vener

Aktiviteten for Steinparkens vener i 2022 var knytt til drifta av parken og Dinosaurhuset. Vertskapsrolla er møte med mange tilreisande frå nær og fjern, og med tilbakemeldingane vi får, er det ein hyggjeleg aktivitet. Vi hadde ope i Dinosaurhuset så mykje vi hadde kapasitet til, 4-5 dagar i veka og 4-5 timar per dag i høgsesongen. Det er ønskjeleg å arbeida for utvida opningstider og utvida sesong.

Sesongen starta påskeaftan med familiedag og natursti, der vi laga seljefløyter og fuglekassar for blåmeis, kjøtmeis, svartkvit flugesnappar og mange av dei andre små flygarane vi likar å sjå rundt oss.

Tidsaksen i Steinparken har fått mykje merksemd sidan avdukinga i 2012. Livet på Jorda er unikt, og for å vidareutvikla forteljinga om historia til livet på Jorda, har det vore jobba med å få produsert filmen «Livet på Jorda snakkar ut!», som er ein digital versjon av Tidsaksen. Premieren på filmen vart arrangert 14. mai i Riddersalen, som eit samarbeid mellom Rosendalstiftinga, Steinparkens vener og Baroniet Rosendal, med tilhøyrande konsertføredrag ved Ivar Baste og Jazzverket og middag i Ridderstuen etterpå for produsentar, faglege bidragsytarar og inviterte gjester.

Lerkehytta

Sesongopning av Steinparken føregjekk 2. juni med Jan Rabben og Sigve Solheim som fortalte om planter og fuglar i Sunnhordland, innimellom musikalske innslag av Sigve.

Prosessen med Lerkehytta har teke tid, men med hjelp frå Elisabeth hos Omega areal as, vart det gjort omfattande berekningar av vindkrefter og snølaster, som var eit nødvendig grunnlag for å berekna innfestingar og forankringar, slik at hytta blir trygg i allslags vêr.

Det vart halde fleire konsertar gjennom året. Først ute var Mats Moland Træen Trio med utekonsert 22. juli i fint, varmt sommarvêr. Deretter følgde Bjarne Øymyr med Luzia Molina, Sindre Aksnes og Stig Klette med fengjande latinske låtar. Det musikalske tilbodet vart avslutta med The Fabulous Dinosaur Christmas Quartet ved Mats M Træen, Bjarne Øymyr, Stewart Berry og Sindre Aksnes på vesle-nyttårsaftan.

Steinparken har også i år vore flittig brukt av ulike organisasjonar. Miljødirektoratet sin fiskeseksjon med 25 personar hadde valt Steinparken som base 29.-30. august for den årlege ekskursjonen sin, og Værvarslinga for Vestlandet kom med 60 personar delt på to grupper 31. august og 7. september. Fleire skuleklassar var innom, mellom anna Kvinnherad vidaregåande skule i fleire rundar for å sjå filmen «Livet på Jorda snakkar ut!», samtidig som ein gjekk gjennom formidlingsopplegget om geologi og livet på Jorda.

Vintergrøn

Laurdag 3. desember hadde steinparkvener frå nær og fjern hyggjeleg kveldssamling med hjortegryte. Knut Sellevold i venelaget orienterte om arbeidet med å samla materiale om Rosendals-malar Lul Krag, og tankane rundt ei digital utstilling.

Fleire ungdomar har vore innom på sommarjobbar, både for drift av Dinosaurhuset og rydding ute i parken. Det vart gjort eit skikkeleg løft med rydding av tre og buskar bak Dinosaurhuset, og frå vasshjulet på Vangssago og oppover langs stien slik at den no framstår som ein tiltalande vintergrøn allé med furutre på begge sider.

Dinosaurhuset med butikken og sal av billettar, kaffi, is og bollar, og suvenirar i lokale bergartar gir viktige og sårt tiltrengte inntekter til straum, drift og vedlikehald av Steinparken og Dinosaurhuset. Økonomien til laget er svært tilfredsstillande.

Med dette vil styret takka alle steinparkvener for medlemskap, hyggjelege dugnadar og god innsats for Steinparken og Dinosaurhuset.

Rosendal, 5. mars 2023

Styret