Arne Gjerde veit betre

I det siste har Arne Gjerde hatt eit par svært usaklege avisinnlegg der han går til kraftige angrep på ei heil yrkesgruppe, byråkratane. Som tidlegare kommunepolitikar veit Arne Gjerde betre enn dei fleste at ei av byråkratane sine oppgåver er å sjå til at den verksemd som finn stad, vert utførd innafor dei retningslinene politikarane har lagt.

Men Arne Gjerde veit også at det er lett å angripa byråkratane, for dei kan vanskeleg forsvara seg mot slike angrep. Det er dessutan populært å snakka nedsetjande om byråkratiet, for mange har, som AG seier, opplevd dei som ei hindring for eigne planar.

Men byråkratane er der for å sikra at alle så langt råd er, vert handsama likt, utan omsyn til pengar, status eller grad av frekkheit.

Om nokon er usamd i kva som er lov eller ikkje, må skytset rettast mot politikarane som har vedteke lover, retningsliner og planar. Med få unntak gjer byråkratane ein ærleg jobb for at samfunnet skal utvikla seg slik politikarane har vedteke.

Lars Børge Sæberg