Matti Røssland til Snikkeriet

Laurdag spelar husnesingen Matti Røssland sine handlaga melankolske gladlåtar i beste New Jersey-tradisjon på Snikkeriet.

– Vi har ikkje for vane å ty til eit så høgtidleg omgrep som «kunstnar», men det er faktisk nettopp det Matti er. Spesiell, sterk og sjarmerande. Romantisk, rotlaus og rådvill. Matti har levd som dei fleste av oss, men har samla på inntrykka, følelsane, nederlaga og seierane, heiter det i ei pressemelding.

 

Gode skotsmål

No er han aktuell med den nye singelen «Lengta heim», som kom ut i april i år.

– Etter fire album, ei best of-plate, mykje radiospeling, flotte kritikkar, prisar og utmerkinga, har Matti Røssland snike seg inn i mange sine hjarter. Han har nok songar til å fylla ein heilt konsert med iøyrefallande sommarlåtar, folkpopperler og radiohits, heiter det i pressemeldinga.

Det manglar ikkje på lovord for vestlandspoeten, som har hausta gode kritikkar i aviser landet over. Mellom anna hadde Ivar Dyrhaug desse velvalte orda å seia om artisten:

– Matti syng såååå fint. Han skriv tekstar som sit, kan melodiar og har ein herleg snerrande vokal. Eg kan nemna minst 20 låtar som beveg meg. Av desse er 15 briljante. Det er vanskeleg å samanlikna, men Matti har sin eigen stil og kvalitet på lik linje med Bjørn Eidsvåg og Jan Eggum.