Marknadsfører KVV på yrkesmessa

I år har elevar frå KVV kjøpt inn 30 raude gardiner, designa t-skjorter, plakatar og banner som skal brukast for å presentera skulen på årets yrkesmesse i Husneshallen.

Mari Mehl

Mari Mehl

mari@grenda.no

23 november, 2017

Elevane frå VG2-lina «Sal, service og tryggleik» har bede om å få ansvaret for å promotera skulen. Dei tek eit fag som heiter «Marknadsføring og sal», der Julie Askeland er lærar. Ho brenn for marknadsføringsfaget, og fortel at dei har det veldig artig, sjølv om det har gått med nokre ekstra timar fordi dei valde å gjennomføra marknadsføring i praksis i staden for som teoretiske prosjekt.

– Dette er ikkje på liksom. Eg er veldig imponert over kva elevane har fått til, og vil gler oss til å presentera skulen på yrkesmessa i år. Men det har gått nokre timar med til grubling og nattevak. Alt skal klaffa, fortel ho.

Dei raude gardinene skal skapa ein felles bakvegg for heile skulen sin stand. Dei vert både i praksis og i overført tyding ein raud tråd som skal få det heile til å hengja saman.

 

Vil løfta yrkesfaga

Lærar Askeland har eit mål om å fremja yrkesfaga. Ho er yrkesfaglærar i botn, men underviser også i naturfag.

– Det er inn i tida å løfta yrkesfaga. Litt for mange tek høgare utdanning, men kva skal vi gjera om ingen køyrer boset, står i butikken eller vil byggja huset ditt, spør ho.

Askeland valde sjølv yrkesfag i ei tid der «alle» skulle gå allmennfag. Ho gjekk lina som då heitte «Kokk og servitør».

– Eg fekk raskt stempelet «det vert ingenting av deg», men eg vart yrkesfaglærar innanfor restaurant- og matfag, tok leiingsutdanning og naturfag. Det ballar fort på seg. Eg byrja då eg var 14, og har verkeleg jobba meg oppover frå golvet. Derfor er eg veldig oppteken av å løfta yrkesfaga, seier ho.

 

Quiz og kafé

Elevane hennar byrjar å rigga til skulen sitt område på yrkesmessa på tysdag, og så skal dei laga all maten som dei også skal servera i kafeen. I tillegg har dei laga quiz som deltakarane på messa kan ta. Rektor har sytt for premie.

– Kva er målet dykkar for yrkesmessa?

– Eg håpar folk ser at det vert ein heilskap, ein raud tråd, og at vi ser ut som ein skule, seier ho.

I haust har elevane hennar også laga instagramkonto og ein promoteringsvideo for skulen som ein del av marknadsføringsfaget. Dei hadde ein intern konkurranse der elevane laga to filmutkast. Rektor var dommar, og når elevane snart kjem tilbake til skulen etter tre vekers praksis i ulike bedrifter skal dei jobba vidare med filmen. Etter kvart kjem han på heimesida til skulen, og på facebook.

Grenda fekk sjå utkastet, og vart imponert over profesjonaliteten. Skulen var filma med drone, og ein fekk vist fram alle tilboda ved skulen. Marknadsføringselevane skal også visa filmen på andre yrkesmesser, som eit ledd i promoteringa av KVV.

Askeland avslører at elevane ved «Sal, service og tryggleik» skal arrangera Open skule i byrjinga av februar.

– Då kan folk koma og sjå korleis skulen fungerer i dag. Det vert marknadsføring i praksis når elevane skal få folk til å koma. Vi gler oss veldig til å ta fatt på det prosjektet, seier den engasjerte læraren.