Maria Mena klar for Baroniet

Den einaste staden i Norge Maria Mena skal ha konsert i år, er i Rosendal. Det skjer i ei ein særs tettpakka periode for Baroniet.

 

I desse dagar er det Bjørn Eidsvåg som rår grunnen. Frå tysdag til torsdag har han tre utselte konsertar i Borggarden. Konsertarenaen tar 330 publikummarar til kvar av konsertane.

– Viss me hadde hatt ventelister litt i tide, så hadde me kanskje fått fleire konsertar. No har me fått ein del namn på venteliste, men det er for seint til å få til ekstrakonsertar i år, seier Anne Grete Honerød til Grenda.

Tidlegare år har Eidsvåg hatt opp til fem konsertar i Borggarden.

 

Framleis ledig

Fredag og laurdag kjem Maria Mena til Riddersalen, i det som blir hennar einaste konsertar i Norge i år.

– Ho har selt godt til begge konsertane, men har framleis noko ledig på begge. Maria Mena har med seg tre musikarar til konsertane. No har ho eit skrive år og nytt album i sikte. Me vart veldig glade då ho sa ho ville til Rosendal, og får ha dei einaste konsertane ho skal halda i Norge, smiler Honerød.

 

Tettpakka

Men trass i desse framsyningane, blir det ikkje tid til å kvila på laurbæra.

– Nei, det går i eitt frametter. Me får Karoline Krüger og Sigvart Dagsland til Riddersalen, medan Åse Kleveland gler seg til å spela heilt akustisk i Den Røde Sal, der ho stiller med gitar og songstemme, og Tove Kraseth på piano, fortel baronidirektøren.

Neste torsdag kjem Minor Majority til deira første framsyning i Baroniet nokon gong, før den trufaste baronivenen Ketil Bjørnstad stiller på scenen saman med Ole Paus. Det siste skjer neste fredag.