– Måker, Tesla og miljøpolitikk

Me kom frå ferietur i Hardanger, og trengte knappe 10 minuttar med hurtiglading for å koma oss heim til Åkra. Ved hurtigladestasjonen i Rosendal stod ein Tesla til lading. Stasjonen kan berre lada éin bil om gongen, og me måtte venta i 1 1/2 time før det blei vår tur. Sola skein, det var ferietid og slett ikkje ille å venta denne kvelden. Det var spennande å sjå måkene læra ungane sine å flyga. Men det kan bli nok måkeskrik, òg. Mannen min, som alltid er etterpåklok, meinte det var eit mistak å ikkje ta Hiace'en (miljøverstingen) på denne ferieturen. Eg på mi side fekk fart på draumen om ein ny el-bil med mykje lengre rekkevidde.

Klimasaka er viktig for KrF. Som listetopp blei eg nyleg oppmoda om å svara på ei spørjeundersøking om tiltak for å redusera utsleppa frå biltrafikken i kommunen. I følgje ein rapport frå Greensight står vegtrafikken for 10% av CO2-utsleppa i Kvinnherad.

Artikkelen held fram under annonsen.

Kvinnherad er ein langstrakt kommune, og for mange av innbyggjarane er bil det einaste alternativet for transport. Eit mål må vera at størsteparten av biltrafikken vert utsleppsfri. Kommunen kan gjera det enklare for folk å velja el-bil ved å leggja til rette for fleire ladepunkt, gjerne ved kommunale arbeidsplassar og parkeringsområde. Ein bør også få fleire hurtigladarar, til dømes ved ferjekaiane. BKK har lova nye hurtigladarar i kommunen. Dette er eit godt tiltak for det grøne skiftet!

 

Hent-meg-buss

Kommunen har allereie fått ein stor del el-bilar med lang rekkevidde i bilparken sin, og det er bra. Etter kvart kan gjerne alle kommunale tenestebilar vera utsleppsfrie? Elles kan me gjera tiltak for å få ned biltrafikken i dei største bygdene i kommunen. Gang- og sykkelvegar må bli prioriterte, og eit betre kollektivtilbod er viktig. Kan det vera ein idé å prøva prosjekt med «hent-meg-buss» som i Sauda? Her køyrer bussen ikkje til faste tider, men kjem når passasjerar melder frå om kor dei skal.

Det er ikkje berre bykommunane som må jobba med å få ned utsleppa. Distrikta har også eit viktig ansvar for redusera klimagassane.

Det er fleire parti enn KrF som har god miljøpolitikk, men KrF tar forvaltaransvaret på alvor både i klimasaka og i alle andre saker.

 

Av Marit Årthun, Kvinnherad KrF

Artikkelen held fram under annonsen.

 

[gravityform id="11" title="true" description="true"]