Leita med helikopter

Politiet har no sikre observasjonar av sakna amerikanar i Rosendal 26. august. Torsdag ettermiddag var politihelikopteret frå Bergen og søkte etter han.

Mannskapet i helikopteret brukte lang tid på å søkja langs vest- og nordsida av Malmangernuten.

– Det er politihelikopter stasjonert i Bergen for tida, og me fekk låna det i nokre timar. Dei konsentrerte leitinga kring Malmangernuten, men hadde også eit søk innover Kjeldestøl og mot Skålafjedl, fortel politioverbetjent Sigurd Børve.

 

Sikre observasjonar

Amerikanaren vart meldt sakna her lokalt torsdag føremiddag. Etter den tid har politiet fått sikre observasjonar av mannen.

– Han sjekka ut av Rosendal Fjordhotel laurdag 26. august. Bankkortet vart sist brukt i Rosendal. Leigebilen han nytta er funnen parkert i Rosendal, og me har hatt kontakt med folk som har snakka med han. Då har han snakka om å gå på tur. Me trur at om det hadde tilstøtt han noko på vegane til vanlege turmål som fjelltoppar og stølar, så ville han blitt funnen for lenge sidan. Difor leitar me no mest utanfor turstiane, seier Børve.

I forlenginga av det ønskjer politiet no kontakt med jegerar, sauesankarar og andre som har gått utanfor stiar, men også langs elvane dei siste fire vekene.

– Me ber folk tenka etter om dei har sett noko som dei ikkje reagerte på då, men som kan ha interesse no. Det er også interessant å vita kor i terrenget folk har gått, slik at me kan eliminera ruter når me skal setja opp søk. Me fryktar han kan ha falle utanfor ein stad, det vera seg i fjellet eller i elv og stryk, sluttar Børve.