Legg på sym rundt Kalven

Søndag morgon hoppar 15 spreke og symjeglade personar i sjøen Snilstveitøy, då med eit mål om å symja saman rundt Kalven.

– Då skal vi ut å symja litt, veit du. Det er eit stykke å symja, rundt fem kilometer. Men det skal vera innanfor for dei fleste så lenge ein vil. Du må sjølvsagt vera glad i å symja, men det eg har erfart frå tidlegare er at det går mest på viljestyrke, seier initiativtakar Vigdis Gammelsæther.

Med på symjeturen har følgjet to båtar, fire kajakkar og ein redningsperson på eit body board.

– Dette er eigentleg ei eingongsgreie frå mi side, men om det blir suksess og folk har lyst til å gjenta det, så er det ikkje noko i vegen med det. Men no er det meir eit litt nerdete, eige initiativ frå meg der all risiko er på eige ansvar. Det er ikkje noko organisert, seier Vigdis.

Det er heller ikkje noko konkurranse der det handlar om å runda Kalven på kortast mogleg tid.

– Det er lågterskel i den forstand at det er fullt mogleg å gå i land å ta ein pause. Det er ikkje nokon konkurranse, men meir ein tur, seier Vigdis som reknar med at turen vil ta mellom to og fire timar.

– Vi hoppar i sjøen i halv ti-tida, akkurat då når det skal regna aller mest heile søndagen, så det er kjempefint. Men det er lagt opp då sånn at folk kan ta hurtigbåten til Snilstveitøy, så hoppar vi ut frå kaien, seier ho.