Lars Kristian (16) er tatt ut i seniorlandslagstroppen

Marius Tveit Nissestad

Marius Tveit Nissestad

marius@grenda.no

Publisert: 10. juli 2020, 15:34

16 år gamle Lars Kristian Ekeland frå Strand-Ulv er tatt ut i troppen til det norske seniorlandslaget i volleyball.

Fredag ettermiddag offentleggjorde landslagstrenar Tore Aleksandersen troppen som skal samlast på seniorlandslagssamling i Oslo 18. til 28. juli. Blant dei 20 volleyballspelarane på lista finn vi kantspelar Lars Kristian Ekeland frå Strand-Ulv.

– Det er veldig stort. Eg fekk melding om uttaket for to veker sidan, og gjekk eigentleg berre å venta på kontrameldinga som sa at hadde skjedd ein feil. Men heldigvis kom aldri den meldinga, ler den høgreiste 16-åringen.

 

Motivasjonsboost

Det betyr at den unge, lovande TIF Viking-spelaren sluttar seg til den absolutte norgeseliten i volleyball i midten av juli. Her har landslagsleiinga sett av ei veke med trening for å førebu seg til EM-kvalifiseringa som ventar neste år.

– Det var ein veldig overraskande beskjed å få, men eg trur ikkje eg er med for at eg skal bli tatt ut vidare, meir for at eg skal læra. Det er jo eit utruleg høgt nivå, seier Lars Kristian.

Uttaket gir ungguten ein motivasjonsboost i treningsarbeidet.

– Det er heilt klart veldig motiverande. I tillegg så fortel det meg at alt det arbeidet eg har lagt ned har vore verd det, seier han.

Med uttaket så vert det også litt endringar i ferieplanane.

– Ja, eg skulle jo eigentleg vera heime på Hatlestrand i den tida der, og så reisa til Oslo veka etter for å delta i U19 og U21 NM i sandvolleyball. Men no blir det visst til at eg reiser ei veke før, ler han.