I 2018 laga LMG Marin ein modell for flytebru over Husnesfjorden. No tenkjer dei på noko liknande for Fjelbergsambandeet. (Skisse: LMG Marin).

Lanserer nytt konsept for flytebru

LMG Marin AS ved dagleg leiar Torbjørn Bringedal meiner Fjelbergsambandet kan vera godt eigna for eit nytt konsept for flytebruer.

Denne veka sendte LMG Marin AS brev til fylkesordføraren. Dagleg leiar Torbjørn Bringedal, opphavleg frå Herøysundet, skriv der om ny industri for bygging av flytebruer og for automatisert produksjon av stål. LMG Marin, som er eit av Norges leiande selskap innan marin teknologi, opplyser at brevet er meint å gje ein innleiande introduksjon til dei moglegheitene firmaet meiner finst innan kryssing av norske fjordar. I prosjektet samarbeider dei med Pontemar AS.

Artikkelen held fram under annonsen.

«Selskapa våre har i mange år arbeidd med planar om å etablera og kapitalisera opp eit nytt marint entreprenørselskap som kan designa, utvikla og levera kostnadseffektive flytebruer og som kan finansierast innanfor rammene av nye ferjeavløysingsmidlar. Marknaden for bruer i Norge har dei siste åra vore styrt av Statens vegvesen, som samstundes har hatt ansvar for all teknologiutvikling og prosjektplanlegging. Det har gitt lite eller ikkje noko rom for alternative bruløysingar, men vi håpar at den nye regionsreforma kan opna for at idear også frå privat sektor kan gjevast vekstmoglegheiter», skriv Bringedal.

Torbjørn Bringedal. (Foto: Privat).

680 meter

Han opplyser så at LMG Marin AS er ein av to attverande konkurrentar i sluttrunden for bru over Nordfjord ved Anda-Lote. Deira konsept for flytebru tilseier ei investering på 3,5 milliardar kroner, noko som skal vera om lag halvparten av det ei hengebru vil kosta.

«For eit nyetablert, norsk marint entreprenørselskap vil det vera urealistisk å byrja direkte med eit oppstartprosjekt på 3,5 milliardar kroner, men vil kunna passa godt etter at ein har gjennomført 1-2 mindre flytebruprosjekt», fortel Bringedal.

Han viser til at LMG Marin tidlegare har arbeidd med design av flytebruforslag for det 680 meter lange Fjelbergsambandet, samt ei bru på 730 meter i Masfjorden.

«Begge desse prosjekta vil eigna seg svært godt som oppstartsprosjekt for bruk av ny flytebruteknologi for norske fjordar», meiner Torbjørn Bringedal.

I brevet står det vidare at Nordfjordbrua vil krevja fabrikasjon av 20-25.000 tonn stål i høg kvalitet, medan dei to moglege oppstartprosjekta ligg på kvar 5-7.000 tonn. Men kostnadseffektiv og føreseieleg storvolumproduksjon av stålmodular finst ikkje i Norge eller i Europa i dag. LMG Marin har difor også sett på moglegheitene for å byggja opp slik produksjon i Norge. Marknaden vil vera bruer, og ein ser for seg pris og kvalitet som er lik eller betre enn stål som vert laga i Kina.

«Vi har identifisert fleire interessante lokalitetar i Møre og Romsdal fylke og Vestland fylke for å etablera fullautomatisert produksjon av stålmodular for bruer, med produksjonskapasitet på 10-20.000 tonn stål per år. Den lokale interessa for ein slik produksjon har vore stor», heiter det i brevet.

Artikkelen held fram under annonsen.

 

Forprosjekt

Pontemar AS og LMG Marin AS søkte denne månaden om forprosjektmidlar hjå Innovasjon Norge. Dersom forprosjektet blir godkjent, er planen å søkja om ei større tilleggsløyving for eit hovudprosjekt på enten Fjelbergsambandet eller i Masfjorden. Kvinnherad kommune har akseptert ein slik framgangsmåte.

Torbjørn Bringedal bed no om at Vestland fylkeskommune legg til rette for at Fjelbergsambandet og Masfjorden snarleg vert tilrettelagde som oppstartprosjekt for flytebruer. Dette for å «verifisera teknologi og kunna gje nødvendig erfaring til norske entreprenørmiljø, slik at firmaa kan delta i framtidige, større flytebruprosjekt langs kysten».