Jørn Øyerhagen Sunde held føredrag for Kvinnherad Senioruniversitet neste torsdag. (Arkivfoto)

Landslova av 1274 som eit europeisk storverk

Torsdag 8. november kjem Jørn Øyrehagen Sunde til Husnes for å fortelja om Landslova av 1274. Magnus Lagabøte ga i 1274 Noreg si fyrste landsdekkande lov, noko som styrka sentral myndigheit og kongemakt – og det er på denne tida ein for alvor byrjar nasjonsbygginga i Noreg.

Jørn Øyrehagen Sunde er professor ved juridisk fakultet ved Universitet i Bergen og leiar av Landslovprosjektet 2014-2024, og ein av våre fremste kapasitetar på rettshistorie.

Artikkelen held fram under annonsen.

Landslova av 1274 er eit storverk i europeisk rettshistorie.

Landslova av 1274 er eitt av fire landsdekkjande lovverk laga i Europa i mellomalderen. Den var ein del av eit stort lovgjevingsprosjekt som strekte seg over 20 år, og som i tillegg omfatta ei bylov, ei administrasjonslov, og ei lovbok for Island. Landslova var viktig for omdanninga av det norske riket frå eit ættesamfunn med slaveøkonomi, til eit samfunn der òg dei svakaste hadde rettar. Og den var svært vellukka.

I dag har ein bevart 37 manuskript og 49 unike manuskriptfragment av Landslova, og truleg fanst det heile 1 manuskript av Landslova per 1150 innbyggjar i det norske riket om lag 1350. Det vakraste av desse manuskripta er Codex Hardenbergianus, som no er lånt ut til Nasjonalbiblioteket, og skal utstillast permanent der frå januar av. Manuskriptet er eit kunstverk, og bilete derifrå vil verta nytta under føredraget som illustrasjon.

Møtet vert arrangert av Kvinnherad Senioruniversitet, og som vanleg på møta i senioruniversitetet vert det servert kaffi og noko å bita i etter foredraget. Og vi må ikkje gløyme det sosiale samværet og den gode drøsen etterpå.

Møta i Senioruniversitetet er opne for alle interesserte som har høve til å delta på arrangement midt på dagen. Vel møtt!

 

Av Kvinnherad senioruniversitet