Kyss og klem og glade fjes på Gurinebasaren

Rekordsøtt jonsokbrurepar og rekordomsetnad for skutebasaren.

Gurinebasaren har blitt ein årviss basar til inntekt for restaureringa av galeasen «Gurine».

– I år vart det rekordomsetnad på sjølve basaren, men det er for tidleg å seia kva nettoen blir før utgiftene er gjort greie for, melder kasserar Kristen Tore Christensen-

Noko av det som drog opp omsetnaden i år var auksjonen av ein tur for 12 med «Gurine». Den enda opp i 14.000 som det høgaste bodet.

I tillegg fekk Interesselaget for Galeas «Gurine» ei overrasking frå Sparebank-1 stiftinga Kvinnherad, som kom til basaren med ei gåve på 100.000 kroner til interesselaget.

– Det var litt midlar att etter førre utdelingsrunde, og det er av desse me deler ut no, forklarte Svein Arne Eidsvik, som er styreleiar i stiftinga.

Han hadde med seg nestleiar Synnøve Solbakken, og styremedlemmene Magnhild Haugland og Gunnar Våge på utdelinga. Sistnemnde var også konferansier, og heldt tråden i heile basaren. Det inkluderte å lesa nummera til vinnarårene og driva opp prisen under auksjonen.

 

Jonsokbrureparet

Han og resten av dei røft 400 som stuva seg saman i teltet på Skålakaien fekk sjå det søte jonsokbrureparet Ada Haugland Melheim og Malvin Thunold Gausvik. Seksåringane var i godlage også etter at dei hadde sett stemninga i teltet. Spesielt den ørlite frampå Ada storkoste seg i rolla som brur.

Betaling for oppdraget var fritt leide i kiosken etterpå, noko dei visste å nytta seg av. Men det var grenser for kor mykje dei små kroppane klarte å ta til seg, så overskotet til basaren vart ikkje nemneverdig mindre av dei ekstra kakestykka dei fekk i seg.

I år vart basaren arrangert på Skålakaien, då «Gurine» ligg til kai der. Til neste år vert basaren etter planen arrangert i Gurinefjæro, der hardangerjekta har blitt restaurert.