Kvinnheringar på boks

Blant Stabbur-makrellen sine mange nye design finn ein også varianten «Kraftkarar frå Kvinnherad».

Morten Nygård

Morten Nygård

morten@grenda.no

6 oktober, 2017

Stabburet sin makrell i tomat er eit av dei klassiske pålegga i Norge. Nyleg fekk reklamebyrået Brunch i oppdrag å sjå korleis innpakninga kunne nyttast til å skapa endå meir engasjement rundt produktet. Løysinga vart 60 nye design på makrellboksen som hyllar dei små særeigenheitene til makrell-elskarar over heile landet. Kampanjen byggjer vidare på plattforma «Er du en av oss?».

– Tanken var å sjå på kven desse «oss» eigentleg er. I ei tid med mykje diskusjon rundt kva som er norsk, synest vi det er fasinerande at enten vi er «Blåruss fra Bærum» eller «Gatesmarte Groruddøler», så elskar framleis 70% av oss det same litt snodige og særnorske pålegget Stabbur-makrell, forklarar kreatørane i Brunch til Kreativt forum.

 

Stort opplag

Blant dei 60 variantane finn ein «Operaelskende Oslofolk», «Bråkete Bergensere», «Sindige Sørlendinger», «Byråkrater fra Brønnøysund», «Naturister fra Nesodden», «Songarar frå Sauda» og altså «Kraftkarar frå Kvinnherad», til og med på nynorsk.

Kampanjeboksane er trykte i eit opplag på 8 millionar.