Etter åtte år som leiar i Sunnhordland skyttarsamlag, gir Ole Bennæs (t.h.) no leiarklubba vidare til Frode Markhus frå Husnes skyttarlag. (Pressefoto)

Kvinnherad-rokade i skyttarsamlaget

Etter åtte år som leiar i Sunnhordland skyttarsamlag, overrekte Ole Bænnes frå Rosendal leiarklubba vidare til Frode Markhus frå Husnes i førre veke.

– Det har vore åtte svært lærerike år, seier Bennæs i ei pressemelding.

Artikkelen held fram under annonsen.

Han fortel at Det Frivillige Skyttervesen (DFS) er ein stor og veldriven organisasjon, der dei lokale skyttarlaga er både ryggrad og hjarte.

– Verdien av det arbeidet som vert gjort i dei lokale skyttarlaga er definitivt underkommunisert, seier han.

Samlaget han no går av som leiar i representerer 17 skyttarlag med i overkant 3.000 aktive medlemer. Om lag 650 av dei er ungdomar. Ei gruppe som har hatt prioritet i samlaget dei siste åra.

– I Norge har vi mykje aktivitetar knytt til jakt- og sportsskyting. Det er med andre ord mange våpen per innbyggjar. Likevel skjer det svært sjeldan at slike våpen vert misbrukt, seier Bennæs, og meiner det eine og åleine handlar om ein godt etablert og særs sunn våpenkultur.

 

I trygge hender

Den påtroppande leiaren, Frode Markhus frå Husnes skyttarlag, har tidlegare vore ungdomsleiar i samlaget, og er med det klar på kvar prioriteringar han tek med seg inn i leiarvervet.

– Svært mange unge kjem i kontakt med våpen i samband med jakt eller sportsskyting. Det vil seia våpenbruk i svært ulike situasjonar. Det er heilt avgjerande for kvaliteten på skyttarane, at det ligg ei strukturert opplæring i botn, seier Markhus og held fram:

Artikkelen held fram under annonsen.

– Norsk våpenkultur skil seg positivt frå alle andre land det er naturleg å samanlikna seg med. Vi er rett og slett i ein eigen klasse. Og heile grunnlaget vert lagt i dei mange skyttarlaga.

Den avtroppande leiaren er trygg på at leiarklubba no er i trygge hender hos Frode Markhus.

– Etter mange år i samlagsstyret og leiar av Husnes skyttarlag, veit Frode godt kva som rører seg i organisasjonen. Som aktiv konkurranseskyttar kjenner han også den sida. Det er ein habil DFS-mann som tek over, og for første gong på åtte år har samlaget ein leiar som kan skyte godt, sjølv på ein dårleg dag, smiler Bennæs.