Kvinnherad Energi feirer 100 år

Ingebjørg Eik

Ingebjørg Eik

ingebjorg@grenda.no

Publisert: 22. januar 2019, 15:00

Laurdag 26. januar opnar utstillinga «Ein sprek 100-åring» på Kvinnherad Bibliotek. Med dette opnar firmaet 100-årsjubileet.

Kvinnherad Energi vart stifta 19. mai 1919 og planlegg fleire aktivitetar og markeringar gjennom året. Fyrst ut er ei utstilling som vil visa historikken i firmaet, endring i arbeidsmetodar, verktøy og måleutstyr. I tillegg har nokre skular laga bidrag til utstillinga. Tidlegare administrerande direktør Terje Enes skal halda opningstale, skriv marknadsleiar Kenneth Ingvaldsen i ei pressemelding. Utstillinga vil stå ut mars.

Vidare vert det eit ope arrangement med konsert på Torgplassen på Husnes 8. juni. Dette i samarbeid med Omstock-Festvalen. Kvinnherad Energi og Kvinnherad Breiband vil òg ha regelmessige standar rundt om i Kvinnherad der dei møter innbyggjarane. Det vert også produsert ein reklamefilm som vil visa mangfaldet i kultur- og idrettslivet i kommunen, og kva betyding straum og fiber har for dette.