Ylvis til Festidalen
Festidalen har no offentleggjort to nye namn til 2025-utgåva: Ylvis og svenske Västerbron.
Publisert
Sist oppdatert
«Laurdagen sprett Ylvisbrørne opp på Festidalenscena og sparkar i gang tidenes hitparade. Og dei sparar ikkje på noko. «Skaol skadle», «Jan Egeland», «Stonehenge», «The Fox» og resten av det latterlege repertoaret vil ljoma over dalen. Veslebror Bjarte er sjølvsagt med. Og ein godtepose musikarar av ypparste klasse som sjonglerer sjangrar etter Bård og Vegard sine grenselause innfall. Det er rigga for rabalder og duka for dans», skriv Festidalen i ei pressemelding.
– Dette blir galskap frå ende til annan. Positiv galskap! Ylvisbrørne er rett og slett multitalent, dei er heilproffe og musikalske til beinet. Kor mange norske artistar har toppa listene i USA og Japan? Dette er festen du ikkje vil gå glipp av, kommenterer bookingsjef Daidalos Dahle.
Annonse
Lei av julemusikk?
Samstundes blir også bandet Västerbron presentert.
«Västerbron er eit makelaust poporkester med sjela i punken, hjarta i 90-talsindie og energien frå amerikansk midwest emo. Syrleg svensk samtidsrealisme i humørfylt herjing. Lei av julemusikk? Sjekk ut «Ännu en dag förgäves» og «Livet är en soppa», skriv Festidalen.
– Deileg svensk rock som plasserer seg fint i landskapet med Bob Hund, Vånna Inget og Håkan Hellstrøm. Ikkje berre er dette råstilig musikk, det er også nokre sabla herlege karar som tar liveopptreden på alvor. Perfekt festivalband, meiner Dahle.
