Wille sesongopnar for Galleri Banken i Ølve

Det er Marta Nerhus som kan kallast kurator for utstillingane i lokalet i Dalsjøen. Ølve-kunstnaren skal ikkje stilla ut sjølv i år, men har nytta nettverket sitt til å få andre til å fylla plakaten.

Anne Knutsdatter Wille, er først ut med måleri. Ho har arbeidt som kunstnar frå tidleg 1980-talet, er busett i Ytre Arna og utdanna frå Akademiet i Bergen.

– I Ølve vil ho visa store og mindre måleri laga over eit tidsspenn på 20 år. Fleire av arbeida er ikkje vist offentleg før. Under opninga på laurdag vil ho fortelja sjølv om kva som inspirerer henne og korleis ho arbeider, opplyser Marta Nerhus.

Wille har hatt mange separatutstillingar rundt om i landet og delteke på gruppeutstillingar i utland. Ho har gjort store utsmykkingsoppdrag, sist på den nye Barneavdelinga på Haukeland Universitetssjukehus.

– Me gler oss, og no framstår galleriet som nytt og fint. Det er montert nye lys for tilskot me fekk frå Bildede Kunstneres Hjelpefond og me har måla lokalet på dugnad, sluttar Nerhus.

Sesongen 2024 i Galleri Banken i Ølve:

23. mars - 14. april: Anne Knutsdatter Wille (maleri)

27. april - 26. mai: Hans Erik Sande (skulptur)

15. juni - 14. juli: Magnar Moen (kolteikning), Andreas Gravdal (maleri)

27. juli – 25. august: Birgit Eide (tekstil), Siri Haaskjold (keramikk)