Vil tilbake til gamle julesongar, legg konserten til kyrkja
Barnekoret Perlene på Halsnøy håpar å gje publikum gåsehud når dei lagar til konsert i Eid kyrkje onsdag.
– Me vil ta tilbake den gamle, gode julestemninga i år. I tillegg til nyare songar som me har framført før, vil me ha med dei klassiske, kjende og kjære julesongane, seier Merethe Normann, ei av dei som står bak koret.
Ho og dirigent Maria Hansen vil ha julekonserten i kyrkja i år. Tidlegare har dei hatt konsertane i kulturhuset, men no håpar dei det skal bli skikkeleg god julestemning i kyrkja.
Annonse
Nye solistar
– Jula høyrer jo til i kyrkja. Me skal pynta, men det er mange som får julestemning berre dei kjem inn i kyrkja, så me trur det vert veldig fint. Og så håpar me at me klarar å nå ut til fleire eldre tilhøyrarar i år, seier Normann.
Ho fortel også at det er nokre nye ungar som skal få prøva seg som solistar dette året.
– Blant anna ein liten skatt på berre seks år, den einaste guten i koret vårt, smiler ho.
Annonse
No ventar den siste opprigginga og pyntinga før dørene kan opnast for publikum på onsdag.
– Me håpar på ståpels, avsluttar Merethe Normann.
