Vil på sin fyrste konsert med favorittbandet - manglar verje

– Eg er veldig fan av Oslo Ess. Dei har så mange gode songar som eg relaterer til. Songane deira fangar stemninga så godt, når eg høyrer på dei tenkjer eg at «denne songen passer perfekt til denne situasjonen», fortel ein engasjert Martin.

Martin har nesten all musikken deira på vinyl, til og med nokre signerte eksemplar. Men det er ein ting han ikkje har.

– Eg manglar ei T-skjorte. Viss eg får meg ein verje håpar eg dei sel Oslo Ess-merch der oppe, seier han.

Aldri sett dei live

Martin kjøpte seg fort billett då han fann ut at favorittbandet skulle koma til Dønhaug.

– Eg sat og «scrolla» gjennom Instagram og ante fred og ingen fare då det plutseleg dukka opp «Oslo Ess på Festidalen». Eg fekk nesten hakeslepp, fortel Martin og glisar.

Sjølv om Martin er blodfan av Oslo Ess, har han aldri vore på konsert med dei. No håpar han at nokon kan stilla som verje.

– Eg har snakka med kompisar om foreldra deira kan stilla opp og eg har til og med lagt ut eit innlegg på Facebook. Det er ikkje så enkelt, for dei kan berre vere verje til to stykke om gongen, og dei fleste har fullt opp.

Kompisane til Martin veit kor stor fan han er, og mange av dei sendte melding når artistsleppet skjedde.

– Er det ein ting eg ikkje har heldt kjeft om dei siste åra er det Oslo Ess. Kompisane mine veit kor stor fan eg er, og nokre har sagt at dei synest synd i meg om eg ikkje får dra på laurdag, seier han og legg til;

– Viss eg får meg verje skal eg stå fremst i publikum og synga med på alle songane.