– Vi har redda mange husnissar i dag

Det var om lag 70 stykke på biblioteket då Grenda tok turen innom.

– Vi hadde forventa at det kom ein del, i fjor var det nærare 200 stykke innom i løpet av dagen, så vi ser for oss noko sånt i dag og, fortalde bibliotekar Ingvild Sandvik.

I år som i fjor har alle som jobbar på biblioteket kledd seg ut i flotte kostymer frå Harry Potter-universet. Dei har også pynta heile biblioteket.

– Det har ikkje vore så mykje tid til planlegging, så vegen blir litt til medan vi går i dag, men det gjer jo at det blir eit litt meir levande arrangement, lo barnebibliotekar Cecilie Elisabeth Vestbøstad.

Ho har mellom anna laga ein stor dekorasjon som skal vera Noldus, husnissen som ved fleire høve hjelpte Harry Potter.

– Den er laga av skumgummi, plasthanskar med ris til føtene, streng, litt pappmasje og litt forskjellig, fortel ho.

– Korleis fekk du det til?, spurde Grenda.

– Nei eg berre byrja, så blei det til, fortalde Cecilie.

Tryllestavar og puslespel

Figuren av Noldus sto på toppen av eit bord, og ved sidan av kunne ein fargelegga ein sokk og henga opp, slik at Noldus kunne gje sokkane vidare.

– Det blir bra for husnissene, eg tru vi kjem til å få frigjort mange i dag, sa Vestbøstad.

Som kjend jobbar husnisser under tragiske kår utan å få betalt, og einaste måten å gjere dei frie på er å gje dei eit klesplagg. Då kan sokkar koma godt med.

Elles kunne ein laga tryllestavar og bli sortert inn i Galtvorthus – veldig mange blei sortert inn i Griffin, men bladfyken (som sjølv er i Håsblås) såg nokon frå Ravnklo og Smygard også.

Det var puslespel, Lego og Playstationspel, smaksprøvar (på eige ansvar) og brevsendingar.

– Vi prøvar å laga noko for ein kvar. Det er jo ikkje alle som har lest bøkene eller sett filmane, så vi ville gjera det slik at alle kan finna på noko, fortalde Vestbøstad.

Herbologi og Eliksirtimar

I år arrangerte også bibliotekarane timar i to av dei kjente faga på Galtvort, og begge var fullteikna. I Herbologitimen fekk elevane læra om urter og blomar som Proplomps og Fippsus.

Så var det ut i praksis for å plukka urter og laga forskjellige blandingar. Til slutt la dei urtene i skoa sine og håpte at magien skulle fungera utover dagen.

Ein gut var til og med modig nok til å smaka på ein kjærleiksdrykk som lærar Raaaakel (biblioteksjef Trude Hege Bergesen) hadde laga til.

– Er du forelska i nokon?, spurde ho.

– Nei, svara guten.

– Då får vi sjå kva som skjer i løpet av dagen, sa Rakel med eit smil.

Med seg hadde lærar Rakel ein hjelpar ved namn Sofie, som eigentleg heiter Rozi. Far hennar køyrer bokbussen, og ho fekk lov til å vera med å hjelpa til.

– Det er veldig kjekt å få vera med her. Det er fyrste gongen eg har vore med i ein magitime, og det var både morosamt og interessant, fortel ho.

Rozi smaka ikkje på urteblandingane, men fortalde at ho har lyst til å smaka på eliksirene dei skulle laga i neste time.

Med så mange innom og så mykje gøy for ungane ser ikkje bibliotekgjengen for seg at dette blir siste gong.

– Nei, det er alt for kjekt til å gje oss med det no. Og så er det jo kjekt for oss vaksne å få lov til å kle oss ut og tulla litt også, og dette er ein flott moglegheit for det, lo Vestbøstad.