Vestlandshumor og åttitalsfest – vil ta vare på lyspunkt i ei krevjande tid

Det er litt over éin månad til Vinterfesten i Ungdomshuset på Hatlestrand går av stabelen. På programmet står mellom anna Finn Tokvam.

– Eg ser fram til ein kveld med Finn Tokvam på eit ungdomshus i ein ferjekommune. Det må berre bli bra, utbryt Hans Inge Myrvold.

Humorist, journalist og forfattar Finn Tokvam har med seg showet «Velkomen», som har fått strålande kritikkar i Bergen, og no vert sett opp med ekstraframsyningar. Fredag 28. februar kjem han altså til Hatlestrand. Om ein vil ha billettar til dette, bør ein handla raskt, skal me tru Myrvold:

– Då har me berre 150 billettar, sidan publikum må sitja i eit teateroppsett. Så ein lyt vera om seg for å få tak i ein billett her, seier han.

Gjestmildt

Fredagskvelden vert det råd å ta ferje frå Årsnes både fram til showstart og tilbake etterpå. Like heldige har ikkje arrangørane vore med å skaffa skyss til Årsnes seint på laurdagskvelden etter ein forrykande åttitalsfest.

– Me har forsøkt både skyssbåt og andre løysingar, men det let seg dessverre ikkje ordna, seier Myrvold.

– Så då må folk skaffa seg vener på nordsida?

– Altså, det er jo gjestmildt og fint både på Hatlestrand og i Ølve, smiler Myrvold over telefonen.

Laurdagen vert det altså full åttitalsstemning, først med oppvarming av trubaduren Stian Thorvaldsen og så konsert med coverbandet Miami Vice Machine, seks musikarar frå Bergensdistriktet som skal laga skikkeleg fest.

– Me kan garantera god stemning. Me har plass til 200 på laurdagen, og eg veit at golvet kjem til å gynga den kvelden, seier Myrvold.

Vinterfesten kom i stand hausten som var, etter at ein gjeng frå nordsida sat og drakk kaffi saman. Dei fann ut at dei ville skapa positive hendingar og opplevingar for bygdene, og Hans Inge Myrvold meiner det trengs kanskje endå meir enn før.

Vil overraska

– Etter ein krevjande pandemi, og i ei uroleg tid der me får dårlege nyhende tredd nedover øyrene kvar dag, og nye beredskapsråd rett som det er, starta me organisasjonen «Bygdafest». Det er eit ord som vert assosiert med noko kjekt og å oppleva noko saman, forklarar han.

Bygdafest vil vera ein kulturinstitusjon for bygda, nærare bestemt nordsida i Kvinnherad. Utanom Hans Inge Myrvold, består organisasjonen av Bjørn Henning Hopsdal Nepstad, Martin Myrvold og Rune Grønevik. Vinterfesten er det første arrangementet deira. Dei håpar det skal verta eit fast årleg samlingspunkt tett opptil vinterferien, når utflytta bygdefolk kjem heim, eller hytteeigarar kjem til bygda.

– Me hadde tenkt at vinterfesten skulle vera i fleirbrukshallen. Men å arrangera konsert i ein idrettshall er teknisk meir krevjande, og det var for kort varsel for dei me inviterte, å kunna stilla til eit sånt lokale. Årets Vinterfest blir difor på ungdomshuset, så får me prøva igjen til neste år med fleirbrukshallen, kan Myrvold fortelja.

Pop-up

I tillegg til Vinterfesten, håpar «Bygdafest» å kunna overraska folk med ulike pop-up-arrangement utover året, kanskje på seinsommaren eller tidleg haust.

– Ingen idear er for små eller dumme, nett no prøver me berre å sjå moglegheiter. Kanskje eit arrangement i kyrkja, kanskje i fjordkanten. Me får sjå, plutseleg skjer det, seier hatlestrendingen.