Verdspremiere på menneskeartane si historie

Stega frå det første mennesket i Riftdalen og fram til arten som har kolonisert kloden er samla i ein 40 minutt lang film, bestilt av Rosendalsstiftinga.

– Tidsaksen, den 23 meter lange granittveggen i Steinparken, er bakgrunnen for at me er her i kveld. Historia om heimen vår, Jorda, er lang. Det er berre bittelitt plass til menneska si historie på tidsaksen. Me ville difor laga noko digitalt som fortalte meir om menneskesoga, forklarte Øystein Skaala då filmen om menneskeartane skulle ha verdspremiere i Riddersalen laurdag kveld

Frå australopithecus

Det er midlar frå DnB-stiftinga som har finansisert filmen, som er den andre i rekkja av tre som Rosendalsstiftinga har fått laga. Den første, som hadde premiere i fjor handla om livet på jorda, frå dei første bakteriane til dyra inntok landjorda. Skaala lova at ein tredje film også kjem, der forklaring på mekanismane som styrer utviklinga på jorda blir hovudfokus.

– Den kjem me tilbake til, sa Skaala

Filmen som vart vist laurdag startar rundt tre millionar år tilbake i tid, med byrjinga på menneskeslekta.

– Soga er lenger enn til siste istid, og startar i Riftdalen i Afrika med Homo habilis, «det hendelege menneske» for nesten tre millionar år sidan. Seinare kom Homo erectus for rundt to millionar år sidan med oppreist gange, fortalte Skaala.

Han tok publikum gjennom grovskissene på det som kom; kven som var dei første som flytta ut av Afrika og vidare til søraust-Asia, om Homo Heidelbergensis, stamfaren til oss og neandertalarane

– Neandertalarane har kome til meir heider og verdigheit dei siste åra. Dei var hendige og litt kunstnarleg anlagde. For 300.000 år sidan dukka me opp, «Det tenkande, kloke menneske». Me tar mykje plass, har kolonisert heile kloden, set spor og utløyser uro. Ein million andre sortar i fare grunna vår aktivitet, peika Skaala på frå scenen.

Bossanovajazz

Han meinte at eit av særtrekka med menneske er det som også gir oss håp om at me kan løysa utfordringane me står føre i notid og nær framtid.

– Evna til samarbeid i grupper og evna til å jobba med store problem er eit kjenneteikn for oss som art. Slik er det no også når det blir jobba med bevaring. Me stoler på dei gode evnene til menneske, og trur det vil enda med at me vil klara å løysa dette. Men me må bestemma oss for vegen framover, slutta Skaala før han introduserer Lucia Molina Quartet.

Molina stod i spissen for kvartetten med Sindre Aksnes, Stig Klette og Bjarne Øymyr serverte

Bossanova-jazz. Dei fire er alle dugande musikarar, og imponerte med veldig fint samspel, stor musikalitet og med ein vokalist og gitarist med stemme og formidlingsevne.

Molina fortalte om korleis det har seg til at ho er her i Kvinnherad i dag, og ho takka Øystein Skaala for alt han gjer og har gjort for mellom anna ho.