Verdiseglas og pilegrimsmesse på Klosteret

Denne sommaren vil ein seglas i fire etappar langs Kystpilegrimsleia frå Stavanger og nordover samla verdiar frå unge og ta dei med seg til Trondheim. Der vil Nasjonaljubileet 2030 få dei overlevert som verdibrev. Fyrste etappe av seglasen startar på Moster 19. mai, og kjem på ettermiddagen til Halsnøy og Fjelberg.

«I «Verdiåret 2024» markerer vi to store jubileum. Det er 1000 år sidan Olav den heilage innførte kristenretten på Moster og 750 år sidan Magnus Lagabøte forma vår landslov. Landslova vart den første fungerande riksdekkande lovboka i Europa. Med bakgrunn i desse rettsjubilea har bispedøme og regionale pilegrimssenter langs Kystpilegrimsleia frå Egersund til Trondheim invitert unge i alderen 15-30 år til verdisamtalar på nøkkelstadane langs leia», går det fram av ei pressemelding.

Desse samtalane er inspirerte av «Guds fire døtre» som er nemnde i landslova og omgrep som makt, likeverd og demokrati. Frå samtalane skal ein skriva verdibrev, med tilrådingar for framtida.

Caroline af Sandnes

Fyrste etappe av seglasen startar med ei markering på Moster. Der vil lokale ungdommar koma med det fyrste verdibrevet. Frå Nidaros kjem biskop Herborg med Olavsflamma frå Stiklestad, som skal lysa gjennom ti år fram til Nasjonaljubileet i 2030. Denne flamma skal følgje seglasen langs kysten til Trondheim. Hardangerjakta «Caroline af Sandnes» er hovudfartøy under seglasen.

På Halsnøy legg «Caroline af Sandnes» til kai i Klostervågen. Derifrå vert det prosesjon opp til Klosteret, der det vert ei pilegrimsmesse. Medverkande på arrangementet er ungdomar frå Øyatun ungdomsskule, biskop i Nidaros Herborg Finnset, fylkesordførar Jon Askeland, ordførar Vegard Bjørnevik, prost i Sunnhordland Svein Arne Theodorsen, pilegrimsprest Einar Vegge, leiar i Bjørgvin bispedømeråd Oddny Miljeteig, songar Andrea Ådland med fleire.