Vann to beste-premiar

Rutebilhistorisk Forening sitt store årstreff vart denne gong arrangert i Førde 10. og 11. mai. Veteranbusslaget HSD-bilane med medlemmer i Kvinnherad og Norheimsund stilte med i alt fire bussar; tre av dei heimehøyrande i Kvinnherad.

Gjengen plar alltid gjera det godt på desse samlingane, og 2024 vart slett ikkje noko unnatak. Ein Volvo B615, 1964-modell med registreringsnummer R-2055, vart kåra til beste buss i klassen 1960-1965. Denne doninga har vunne fleire slike prisar tidlegare.

Knapt noko liknande

Ein annan buss stilte til start for fyrste gong; ein Scania turbil, 1985-modell, med skiltnummer PN67624. Den kom til Kvinnherad som ny i mai 1985. Dei fyrste 3,5 åra vart han nytta som turbil til Bergen, Spania og Benidorm. Seinare vart det vanleg rutekøyring.

– I 2010 skulle den skrotast, men det tykte vi var for gale, så då henta vi den, smiler Thor Arne Eik Nygård frå Sandvoll.

Han står no som eigar av bilen, men i restaureringsarbeidet har han fått god hjelp av kollegaene i Veteranbusslaget HSD-bilane og andre med interesse for slike prosjekt. Bussen har vore med på to landstreff tidlegare, i Kristiansand og på Voss, men då med prøveskilt og dermed utan å bli bedømt. No vart bussen godkjent rett før landstreffet etter mykje arbeid i innspurten.

– Vi fekk veldig mykje merksemd for denne bussen. Årsaka er truleg at det knapt finst noko liknande, for dette er den einaste bussen i sitt slag som ikkje er gjort om til campingbuss. Det vart faktisk berre bygd seks slike utgåver, og vår buss er sjølve piloten, fortel Thor Arne.

Fyrste forsøk

Bussen gjekk like godt til topps på fyrste forsøk, og vann prisen som beste buss blant årgangane 1985-1989.

– Det var ei kjempeoppleving og stor stas å vinna, opplyser Thor Arne Eik Nygård.

Delegasjonen frå Kvinnherad og Norheimsund bestod av 15-16 sjåførar pluss vener og andre interesserte.