Uvanleg vêrfenomen: Opplett og stille under julegateopninga
Innbyggjarane i Rosendal må framleis vera lettare sjokkskadde. Under julegateopninga torsdag kveld var det nemleg korkje storm eller ausregn.
Publisert
Sist oppdatert
Det har nesten vore ein fast tradisjon at under julegateopninga i Rosendal så har vinden kasta seg over Skålagato frå alle himmelretningar, i tett samspel med heftige regnbyer, eventuelt sludd. Men i år vart bygda i staden velsigna med nydeleg haustvêr (ikkje vintervêr sidan vi framleis var i november). Dermed var det uvanleg mange som våga å ta turen til arrangementet.
Gjestene vart møtt av Stefan Barackov, dagleg leiar i Rosendal utvikling, som hadde fyrt opp i bålpanna og serverte rykande varm gløgg. Ulik musikalsk underhaldning stod også på programmet. Både songarar frå Cantus Firmus, Rosendal Tweens og Rosendal barnekor var i aksjon, det same var Rosendal skulekorps. Sjølvsagt var det også høve til å gå rundt juletreet.
Annonse
Julenissen
Då Solfrid Hellesøy Siqveland fekk forsamlinga med på å ropa på Julenissen, var det ikkje lenge før den skjeggpryda karen dukka opp i horisonten, noko som førde til at både små og litt større sprang i hans retning. Dei vart løna med småpakkar med godteri oppi.
La oss håpa dette var starten på ein ny tradisjon – julegateopning i fint vêr. Men det er kanskje å strekkja optimismen vel langt?
