– Utan tvil verdas beste publikum

– Eg må seia at det gjekk overraskande bra, til og med strålande utifrå dei føresetnadane vi hadde, fortel styreleiar i Festidalen Una Kolle.

Fredagen var prega av mykje vind og regn, og konsertstarten vart utsett med to timar. På eit tidspunkt var vinden 20 m/s i kasta.

– Det var så kraftig vind på dagen at vi såg oss nøydde til å stenga scena, så vi fekk ikkje rigga det vi skulle i tide. Det var ikkje det at det var farleg å vera der, men vanskeleg å jobba, fortel Kolle og legg til;

– Så vi måtte hiva oss rundt og rokera på programmet, og måtte diverre kutta ein av artistane.

Alle var nøgde

Sjølv om det var litt vanskelegheiter på fredagen, såg det ikkje ut til at publikum vart plaga av det. Om lag 2970 stykke møtte opp på jordet til konsertstart klokka 20.15.

– Både vi i leiinga og artistane var enormt rørte over publikum. At dei ikkje tok det ille opp at vi måtte utsetja, men møtte opp likevel er heilt fantastisk. Vi frykta ei stund at folk ikkje ville koma. Vi har utan tvil verdas beste publikum, seier Kolle.

Artistane var også veldig nøgde med årets festival. Mellom anna Timbuktu kommenterte frå scena at han var inspirert over at folk tok turen ut i uvêret.

– Vi er takksame for artistar som viser ein enorm samarbeidsvilje, er fleksible og vel å gå på scena i drittvêr. Dei risikerte utstyr som vart vått, og det var ikkje alle som kom tørrskodd frå det. Vi har sett bilete av vokalisten til Highasakite, der det ser ut til at håret står bak ho, seier Kolle og legg til;

– Alle var kjempemotiverte til å gå på scena. Beharie var veldig lei seg for at han måtte avlysa, men vi håpar at han koma igjen neste år.

Kolle kan fortelja at billettsalet for 2025 allereie er i gang, og at det såleis blir festival neste år også.

– Vi har allereie selt ut «early bird» billettane, fleire enn 300 stykke. Det er jo eit signal til oss om at folk hadde ei god oppleving i helga, trass dårleg vêr og låg temperatur, fortel ho.

Damene måtte venta

Sjølv om det ikkje gjekk knirkefritt er arrangørane nøgde med helga. Men ein ting har dei notert seg til neste år; køen til dame-doen.

– Det fungerte ikkje så godt i år. Vi har dimensjonert for talet folk, men det vi ikkje hadde rekna med var at folk var så kalde og hadde så mykje klede på seg. Dette førte til at det vart brukt meir tid på toaletta, med av- og påkleding, og då vart køen ståande ei stund diverre, seier Kolle.

Laurdagen vart endå betre besøkt enn fredagen, med over 3000 par føter på jordet. Dei fleste hadde heldigvis støvlar på seg, då det ikkje mangla gjørme på Dønhaug denne kvelden. På campen var det også litt utfordrande til tider, og eit par av telta vert tekne av vinden. Men eigarane vart godt tatt vare på i camp-teltet.

Festidalen er kanskje det største arrangementet i Kvinnherad kommune, og til og med tilreisande har fått augne opp for festivalen.

– Det er veldig rørande for oss at folk er så lojale og kjem år etter år. Og ekstra kjekt at så mange kjem frå andre stader, seier Kolle.

– Det er jo lettare å både gå på og arrangera festival når det er fint vêr. Det var mykje hardt arbeid og ganske høg puls ei stund, men etter tilhøva er vi utruleg nøgde, konkluderer Kolle.