Ung kultur møttest på UKM

I alt 20 innslag og over 40 ungdommar bidrog til å gjera årets UKM til ei kulturell massemønstring.

Før heitte det Ungdommens kulturmønstring, no er det døypt om til «Ung kultur møtes». Og etter nokre år utan eit slik arrangement i Kvinnherad, var det svært gledeleg for kulturen i kommunen å sjå at så mange ynskte å stå på ein lokal scene og visa seg fram.

Uttrykka var musikk, dans og foto. Den einaste som deltok i sistnemnde kategori var Maia Fredheim, som også framførte song på scenen i kinosalen.

– Det er gøy å ta bilete og utforska nye motiv. Men å synga på ein scene gir ein annan respons frå publikum, sa Maia til Grenda.

Bileta hennar rulla på storskjerm i Festsalen, eit lokale som vart nytta som kafé mellom slaga.

 

Rock ‘n’ roll

Den musikalske delen av UKM vart starta i Ungdomssenteret, der tre rockegrupper stod på scenen. Ida Presthus fronta Cold Chase og song «Paranoid» om lag like godt som Ozzy Osborne og Black Sabbath gjer det. Kvartetten overlét så scenen til duoen Vegar(d), som etter si framføring sendte stafettpinnen vidare til Lika da.

Etterpå flytta UKM seg inn i kinosalen, der konferansierane Trym Vårdal og Brede Grønningen jr. hadde 13 nye innslag å introdusera. I tur og orden fekk publikum oppleva dugande og talentfulle ungdommar i aldersspennet 12 til 19 år.

 

Juryen

Ein jury beståande av Trude Hege Bergesen, Jorun Larsen, Arve Rødland og Daidalos Dahle følgde nøye med utøvarane for å sjå kven dei ville senda vidare til fylkesmønstringa i slutten av april. I tillegg skal dei gje kvar einskild utøvar ei skriftleg tilbakemelding.

Prosjektleiar Una Kolle kunne ikkje publisera lista over kven som kom vidare då Grenda snakka med ho på måndag ettermiddag.

– Me har ikkje fått tak i alle enno som juryen ynskjer å senda vidare, forklarte ho.

Grenda kjem tilbake med kven som gjekk vidare i torsdagsavisa.