Tok i mot Olavsflamma

Søndag starta Verdiseglasen på Moster, på ei ferd som skal enda i Trondheim (Nidaros). Om bord har dei ei skipskiste som skal fyllast med verdibrev, skrive av lokale ungdomar langs ruta. Verdibreva inneheld den oppveksande generasjon sine ynske for framtida. Om bord i hardangerjakta «Caroline af Sandnes» er også Olavsflamma. Den vart tent på Stiklestad, og skal lysa fram til nasjonaljubileet i 2030.

«Caroline af Sandes» la til kai i Klostervågen i 15.30-tida søndag.

– Eg vil tru de har hatt ein fin seglas i dag? ropte ordførar Vegard Bjørnevik, som var velkomstkomité saman med Linda Øen og Helén Petersen frå Sunnhordland Museum.

– Heilt fantastisk, svarte kystpilegrimsprest Einar Vegge.

Louise frå Moster gjekk på land og overrekte Olavsflamma til Trine Ommer Bjelland frå Halsnøy. Ho går i 9. klasse på Øyatun skule. To andre jenter frå Moster bar kista med verdibrev.

Gamle klosterporten

Med pilegrimspresten og Trine i front gjekk alle dei prominente gjestene og dei ganske så talrike frammøtte i prosesjon opp til klosterruinane, der det skulle haldast ei pilegrimsgudsteneste. Med i følgjet var også sjølvaste biskopen i Nidaros Herborg Finnset, prosten i Sunnhordland Svein Arne Theodorsen, og fylkesordførar Jon Askeland. Ved den gamle klosterporten las Vegge, som er gift med biskop Ragnhild Jepsen i Bjørgvin, ei bøn og song eit gamalt gregoriansk «Halleluja».

For biskop Finnset vart det eit fint fyrstemøte med det ho kalla «den vakre øya».

– Eg har aldri vore her før, men du verda kor fint det er å koma hit, sa ho då ho talte under gudstenesta.

Har du fyr

Programmet elles bestod mellom anna av at artisten Andrea Ådland song slageren «Har du fyr», og det vart opplesing av verdibrevet frå Halsnøy. Rebekka Attramadal trakterte pianoet.

Seinare på kvelden sigla «Caroline af Sandnes» vidare til Fjelberg.

– Moster og Halsnøy kloster er hovudstoppestader på seglasen, og i morgon skal vi vidare til Fana. Men i kveld skal vi til Fjelberg og overnatta i prestegarden. På Fjelberg har vi eit tradisjonsrikt stemne 2. pinsedag, og vi blir med på gudstenesta før vi reiser vidare, opplyste Svein Arne Theodorsen til Grenda.