Timbuktu opnar Festidalen 2024

– Timbuktu er tidenes viktigaste og mest populære hiphopartist i Skandinavia. Og no kjem han for å opna fredagen på Fesidalen. Han frelste Dønhaug i 2016, og returnerer for å gjera vatn til vin og fylla sure kjeftar med farin. Aldri før har me hatt ei slik opning på festivalhelga, seier bookingsjef Daidalos Dahle i Festidalen.

Maradona og Muhammed Ali

Dei som fekk med seg svensken sist han vitja Uskedalen hugsar truleg at det svinga noko enormt av det mannen gjorde saman med orkesteret. Ikkje berre kom han til Festidalen med ein tjukk bunke hitar i reiseveska, men han fylte opp scenen med musikarar som sytte for ei backing få andre har levert på Dønhaug. Dahle er samd i vurderinga.

– Konserten i 2016 er ein av dei absolutt feitaste me har hatt i Festidalensoga. Den heng heilt der oppe saman med Maradona og Muhammad Ali (som sist Grenda sjekka, ikkje har vore på Festidalen). I år køyrer me perfekt festivalstemning frå første anslag, og så dansar me oss gjennom heile denne to-dagars feelgood-maratonen, gliser Dahle.

Konserten blir også ein av særs få konsertar Timbuktu gjer i Norge i 2024.

– Nokon gongar skal ein snu ting og tang på huggu, og klinka til med festen først som sist. Me er utolmodige, og gidd ikkje utsetta stemningstoppen til seine kvelden. Kaka først, så snop og is med kva topping du vil, er årets ernæringsråd frå Daidalos.