Tar Magnus Lagabøter med til Senioruniversitetet

Professoren i rettshistorie er aktuell med to bøker om dagen, som begge har hausta strålande kritikkar. Han har også nyss fått ein internasjonal pris for arbeidet sitt med juss-forsking.

Jørn Øyrehagen Sunde er opphavleg får Uskedalen, er tett knytt til Baroniet Rosendal, der han mellom anna held tråden i det årvisse lokalhistoriske føredraget. Han er professor i rettshistorie ved Institutt for offentleg rett ved Universitetet i Oslo, i tillegg til å vera forskar ved Nasjonalbiblioteket.

– Jørn er ein framifrå formidlar og føredragshaldar. Eg kjenner knapt hans make. Føredraget vert med utgangspunkt i stoffet han har skrive om i bøkene og norsk rettshistorie. Høyrest det tørt ut? Det lovar eg at Jørn gjer til skamme, skriv Steinar Haugan i styret for Kvinnherad Senioruniversitet om Øyrehagen Sunde.

Dette skriv professoren sjølv om føredraget han skal halda:

– I 1279 gav pave Nikolas 3. alle som bad for kong Magnus Lagabøter, dronning Ingeborg og baronane deira 100 dagar avlat. Det vil seia at dei som bad for kongen og hans næraste fekk 100 dagar syndefri. Eit slikt privilegium var det knapt nokon annan konge som fekk i Europa på 1200-talet.

Men Magnus Lagabøter er kongen som ikkje skulle verta konge. Han var ikkje eldste kongsson og han var truleg sjukleg, og fekk difor utdanning av fransiskanarane i Bergen i staden. Då han likevel vart konge, slutta han fred med naborika, og brukt ressursane sine på å laga det fyrste riksdekkjande lovverket i Europa som faktisk vart brukt.

Slik la Magnus Lagabøter grunnlaget for den norske staten slik vi kjenner den i dag. Det var dette storverket som var anerkjent av pave Nikolas 3. i 1279.