Takka av dirigenten etter 14 år
Onsdag vart dirigenten Tor Skeie Olsen takka av for lang og trufast teneste for Uskedal skulemusikk.
Publisert
Sist oppdatert
– 14 år som dirigent i Uskedal skulemusikk. Det er historisk. Tor Skeie Olsen kan med dette syna til lengst tenestetid av dei som har vore musikalsk leiar i laget si soga, skriv Uskedalen.no i samband med at Skeie Olsen no gir seg som dirigent for skulekorpset i bygda.
Styret takka Tor Skeie Olsen med gode ord og gav han ei karikaturteikning av dirigenten, teikna av Lars Slettebø.
Annonse
– Våren 2010 kom Thor Inge Døssland og styret på døra til Skeie Olsen og bad han om å ta dirigentansvaret for skulemusikken i Uskedalen. Med oppstart i august 2010 har det no gått 14 år, men som Tor sa på avslutninga i kveld: Det er ei tid for alt, skriv nettsida vidare.
Tor Skeie Olsen fortalde om tida med skulemusikken, 14 år i takksemd og med mange gode minne. Eit korps vil alltid vera i medgang og motgang. Medlemstalet har vore alt frå berre fem musikantar til 20 på det meste, går det fram i saka til Uskedalen.no.
– Han takka foreldregruppa for god tilrettelegging og støtte. Samhald og samarbeid er det som skal til for å lukkast. Samarbeidet med Rosendal skulemusikk har vore og er nyttig. Tor har ikkje talet på alle musikantane som har vore innom skulemusikken i hans tenestetid, men det er mange. Nokre sluttar med korpsmusikk, andre går vidare og nokre tek musikkutdanning og spelar i korps på høgt nivå, avslutta Uskedalen.no.
