«Svinn» til topps
Njål Thunold Hatteberg utmerka seg nok ein gong då han i oktober fekk utdelt Statsbygg sin studentpris for interiørarkitektur.
Publisert
Sist oppdatert
I år vart prisen delt mellom to nominerte, då nivået var så høgt at juryen ikkje klarte landa på berre ein.
«Årets nominerte prosjekt til «Statsbyggs studentpris for interiørarkitektur» 2023 har imponert juryen med si evne til å tenkja nytt og visa mot til å utforska bredda og det tverrfaglege innan arkitektur. Dei nominerte prosjekta er eit innovativt bidrag til å stadig utvikla og tøya interiørarkitektfaget sine tradisjonelle grenser for å svara på aktuelle samfunnsbehov», heiter det på Universitetet i Bergen sitt fakultet for kunst, musikk og design sine sider.
Annonse
Njål Thunold Hatteberg med sin «SVINN» delte førsteplassen ilag med Kristine Matland og hennar prosjekt «SIRKULÆR».
«Omstillinga til sirkulær økonomi krev nytenking og innovasjon. Arkitektur- og byggebransjen oppmodast til å «Design out waste!», det vil seie å finna strategiar som reduserer etterspurnaden etter nye materialressursar gjennom endringar i sine design-, prosjekterings- og produksjonsprosessar. Hatteberg og Matland har overtydd juryen ved å ta opp denne utfordringa på ein eksperimentell måte, og tilnærma seg problemstillinga frå kvar sin kant», heiter det i juryen si grunngjeving.
Om «Svinn»
«Ved å bruka både analytiske metodar og ein leiken eksperimentell tilnærming, utforsker prosjektet korleis materialsvinn og overskotsmaterial kan reduserast til eit minimum som eit eige integrert aspekt av design- og produksjonsprosessen. Hatteberg svarar på behovet for nytenking i vegen mot ein berekraftig omstilling, og visar at det er mogleg å skapa innovative løysningar for møbel- og produktdesign som både er estetisk tiltalande og miljøvennlig», heiter det om «Svinn» på Universitetet i Bergen sine sider.
