Strupebandet syng advent inn

I god tradisjon held Strupebandet også i år førjulskonsertar i byrjinga av desember.

Første helga i advent blir det to konsertar i Halsnøy Samfunnshus fredagskvelden, ein i Kvinnherad kyrkje laurdagen, og ein i Valen Kyrkje søndagen.

– Koret har jobba fram ein miks av julemusikk, gospel, litt jazz, klassisk og andre ting. Det blir store kontrastar og mykje lovsong og inderlege tekstar, glede og rytmar så tittelen «Glory Hallelujah» kom nesten av seg sjølv. Solistane i koret er flittig brukt også på denne konserten, skriv koret i ei pressemelding.

Koret har med sitt faste orkester, men ny trommeslagar denne gongen er Remi Sjo.

Ingeborg Kvamme har også i år teikna og planlagt scenografi til Halsnøykonsertane, slik at det visuelle uttrykket er med og forsterkar innhaldet i tekstane.

– Strupebandet ønskjer alle hjarteleg velkomne til konsert og vil gjerne dela både sprudlande og stille glede, mykje varme og førjulsstemning med publikum, sluttar koret.