Stiller ut vakre naturmåleri

I Særstenhuset på Sæbøvik kan ein sjå både Halsnøy Kloster, Baroniet i Rosendal og Solastranda på veggane. Malvin Johnsen har absolutt eit auge for det vakre, men også noko som er meir viktig; ein evne til å gjengi det han ser.

– Eg er veldig inspirert av naturen, og spesielt sjø og hav, fortel kunstnaren, som bur i nærleiken av Solastranda ilag med kona Tove.

Malvin er oppvaksen på Halsnøy, og oldefar hans var Martin Enoksen, som mellom anna reiste meieri og fabrikk på Sæbøvik.

I fjor sommar stilte Malvin òg ut i Sæbøvik, og han minnest at det var litt betre besøk den gong.

– Men det har vore eit skikkeleg regnver denne veka, så det spelar nok inn, fortel han, og legg til;

– I dag har det vore ein jamn flyt med folk som kjem innom, og eg har til og med fått seld ein del bilete.

Malvin meiner det er litt dumt at dei fleste susar rett forbi utstillinga, og lurer på om det er manglande interesse for kunst som gjer det.

– Det er litt trist at folk berre går forbi her utan å koma inn. Ein treng for all del ikkje kjøpa noko, men ein kan jo stikka innom og slå av ein prat eller berre sjå på bileta, seier han.

Dei som tar turen derimot (og medan Grenda er innom er det ein del) får sjå vakre måleri av flotte landskap. Det er verkelig som å sjå naturen lysa mot deg frå veggene. Malvin har måla og teikna i alle år, men gav seg ein periode på grunn av ein litt kuriøs grunn til å vera målar.

– Eg er fargeblind, seier Malvin til ein mildt sagt overraska bladfyk.

– Det kan ein verkeleg ikkje sjå i bileta dine, seier Grenda.

– Eg får litt hjelp. Somme tider vel kona mi ut fargane og så måler eg. Så ser ho gjerne over etterpå om det er noko som burde rettast på, avslører Malvin med eit smil.

Om ein vil ha med seg denne flotte utstillinga må ein vere rask, då den kun er ope til førstkomande sundag.