Sprengøver fram mot russerevypremieren
Sketsjane er ferdigskrivne, billettsalet i gang og premieren er knappe to veker unna. Fram til dess skal det øvast, øvast og øvast for kvinnheradrussen.
Publisert
Sist oppdatert
– Me er godt i gang. Me er i gang med øvingane, og det blir eit køyr dei neste to vekene for å få øva det godt inn. Sketsjane var ferdigskrivne før jul, og med god hjelp frå Karianne Solheim har me laga ein øvingsplan som gir oss bra struktur på det me skal gjera fram mot premieren, seier revysjef Annie Kloster, saman med Ingeborg Saghaug, Gaute L. Tungesvik og Hallvar Saghaug.
Lover noko nytt
Annonse
Premieren er likevel ikkje lenger unna enn at dei neste to vekene må nyttast til fulle. 19. januar har russen premiere på «Null Merknad» - som er arbeidstittelen på revyen - i kinosalen i Kulturhuset Husnes. Dagen etter blir den andre og siste framsyninga sett opp.
– Første øving var på onsdag, første skuledag etter juleferien. No køyrer me på, seier ungdommane.
Bortimot 50 av russane er med på revyen. KVV-lærarane skal sjølvsagt få sine pass påskrivne, og det blir råd å få med seg eit nytt prevensjonsshow, for dei som ikkje allereie er utlærte.
No plar ikkje russerevyar nødvendigvis vera tidtrøyte for sarte sjeler, men «Null Merknad» flyttar seg kanskje over i ein ny standard.
Annonse
– Det blir ikkje jokking på scenen i år, lover Ingeborg og Annie.
– Ikkje gutestripping heller, me lover publikum noko heilt nytt, seier revysjefen.
– Dessverre, repliserer ein litt skuffa Tungesvik-gut.
– Eg fekk streng beskjed av pappa (ikkje heilt ukjente Oddbjørn Kloster, journ.merk) om at han var lei det, og ikkje kom viss me tok det med. Eg vil ha pappa i salen, så då blir det ikkje gutestripping, svarer Annie med litt overberande mine.
Det blir heller eigen song og koreografi til gutane.
Hjelp
Annonse
– Spør me ein lærar om noko, så får me alltid hjelp. Men me har ikkje lent oss på andre vaksne enn Karianne Solheim for å koma i mål.
– Og så har me ein veldig flink revysjef, som jobbar veldig godt, skryt Gaute L. Tungesvik.
– Streng når ho må, stort sett alltid kjekk. Eg trur me byrja tidlegare enn det som har vore vanleg, legg han til.
Kulturhuset Husnes tar seg av alt som har med billettsal, lys og lyd å gjera. Det er KVV-russen 2024 veldig glade for.
– Det sparer oss for mykje organisering og arbeid, og då kan me heller konsentrera oss om det som skal føregå på scenen, konkluderer kvartetten.
Om lag 200 billettar selt berre på éin dag med sal.
Annonse
– Det gir eit godt løft for å jobba god fram til premieren, sluttar gjengen.
