Songar, bølgjer og sondar

«Aksiom er eit Oslo-basert ensemble som hadde sin debut i 2010. Sidan har det vore eit etablert namn i musikkmiljøet i Noreg.

Noko av styrken til ensemblet ligg i at musikarane er ein blanding av klassisk utdanna og musikarar med bakgrunn frå jazz/improvisasjon. Dei har tilhøyr til ensembla Nakama, Vilde&Inga, Paal Nilssen-Love Large Unit, Skadedyr og Ensemble Allegria.

Aksiom har spelt på store festivalar som Ultima, Borealis, Klang og Ung Nordisk Musikk. Dei har i løpet av åra hatt samarbeid med ei rekke nordiske komponistar, ensemble og kulturaktørar. I 2016 vart ensemblets debut-CD utgjeven på LAWO Classics, til gode kritikkar i mellom anna Morgenbladet, Klassekampen og TEMPO (UK)», skriv dei i ei pressemelding.

Program og utsnitt av komponistane sine eigne ord om verka:

Christian Meaas Svendsen: Probe no. I (2021, rev. 2022)

Probe no. I er ei lita utforsking i nesten-unisonitet, der det urokkelege flaggskipet i vestleg kunstmusikk, pianoet, leiar an. Dykk vil få høyre ein revidert versjon av stykket, som fyrst vart framført i Kampen kirke 21.11.2021.

Tine Surel Lange: De ni bølgene (2021)

Verket er inspirert av dei ni søstrene i norrøn mytologi som representerer havet sine bølgjer. Dette verket er ein del av mitt arbeid med lydkoreografi - der visuelt materiale og/eller rørsler tolkast lydleg. I “De ni bølgene” følgjer utøvarane instruksjonar for kva som skal spelast, når det skal spelast, og korleis det som spelast skal utvikla seg - alt kobla saman med signal i videomaterialet som er synleg for både utøvar og publikum.

Esaias Järnegard: Songs for simone (2021, rev. 2022)

I Lotta Lotass bok «Svarta Solen» (2010) vert lesaren møtt av ein tett, poetisk tekst, som i 340 avsnitt omhyggeleg skildrar ein ukjend, litt postapokalyptisk stad. Dei siste åra har eg brukt mykje tid på å føreslå og fantasera om mogleg musikk på denne staden. Avsnitt etter avsnitt har eg prøvd å skildra i ulike klingande formar med skiftande fokus.

Medverkande på konserten;

Lynetta Taylor Hansen, fløyte

Anja Nedremo, saksofon

Henrik Munkeby Nørstebø, trombone

Anders Kregnes Hansen, slagverk

Jonas Cambien, piano

Ole Martin Huser-Olsen, gitar

Vilde Sandve Alnæs, fiolin

Ingvild Nesdal Sandnes, cello

Christian Meaas Svendsen, kontrabass

Kai Grinde Myrann, dirigent