Snart klare med ny bok - søkjer om tilskot

Ei nemnd samansett av representantar frå ulike lag og organisasjonar på Halsnøy, tok i 2021 initiativ til å gje ut bøker om frakte- og fiskebåtar frå Halsnøy i gammal og ny tid.

«Då prosessen starta var det registrert bortimot 500 fartøy i ulike storleikar frå 1900-talet og framover, og mange av desse er omtalt og vist bilete av i bøkene. Svært mange halsnøy- og fjelbergbuar, samt folk frå Valen i gamle Fjelberg kommune, har opp gjennom åra enten delteke på brislingfiske, vore mannskap på eit eller anna fraktefartøy, eller på annan måte hatt tilknyting til det maritime miljøet», skriv boknemnda i eit brev til formannskapet.

Bok nummer 1 kom ut i fjor haust. No held gjengen på med neste bok, som er planlagt å koma ut i november i år.

«Målet vårt er at også denne utgåva skal vera av høg kvalitet, ei praktbok! Forutan detaljerte opplysningar og bilete av båtar, inneheld bøkene intervju med mange av dei som har hatt tilknyting til sjøen på ulike måtar. Dette er tvillaust lokal kysthistorie og -kultur, som det er viktig å ta vare på», heiter det i brevet.

To grunnar

Organisasjonane bak prosjektet ser to viktige grunnar til å gi ut slike bøker: Det eine er den dokumentariske delen, som er eit slags oppslagsverk over alle fartøya i området. Den andre er å visa dei som veks opp i dag korleis forfedrene måtte leva og virka for å få endane til å møtast.

«Vi snakkar om to generasjonar bakover i tid, med ei teknologisk utvikling som ingen den gongen kunne sjå føre seg. Mange unge i dag veit lite om tida vi har fokus på i bøkene», vert det slege fast i brevet som er signert av Gerhard Eide og Kristian Hus.

Prosjektgruppa har estimert kostnadene med den nye boka til 550.000 kroner. Sidetalet blir om lag som i den fyrste boka, og dei har tinga 900 eksemplar. Dei søkjer formannskapet om ei løyving på inntil 50.000 kroner.