Smekkfullt på sjørøvarshow

– Det har vore heilt fantastisk, seier Mette Hvidevold i velforeininga til Halsnøy Kulturhus om det dei har taua i land denne veka.

– Me har hatt fullt på alle arrangement. Mange dugnadsfolk som har vore i sving, men folk har vore glade og fornøgde på alle arrangement, legg ho til.

Fullt hus

Då sjørøvarane og koret Perlene sveiva i gang sitt show klokka 12, var det aldeles fullt på kaien utanfor Halsnøy Kulturhus. Både sommarvêr og underhaldning trekte store og små til festivalområdet.

– I dag hadde me bestilt fint vêr, og me har kanskje fått nokre grader for mykje, men det er ikkje like lett å treffa, smiler Hvidevold.

Ho hadde ikkje noko tal på publikum, og torde ikkje tippa. Om nokon hadde sagt tusen, hadde protestane truleg vore få.

– Men det kokar her, seier Hvidevold på innsida av salsdisken.

Is og drikke var det det gjekk mest av.

– Likevel, festivalvaffelen med is og bær går det alltid mykje av, uansett kva vêr me har, og uansett om det er arrangement for vaksne eller barn, seier Hvidevold mens ho steiker i veg på nettopp festivalvaffelen.

Veka har bydd på stort publikum på alt som har føregått, frå familiearrangementet til Halsnøy Indremisjon som opna ballet på tysdag, via Ausekarane onsdag og quizen torsdag, til sjørøvarshowet laurdag.

I tillegg har det vore den tradisjonelle reke- og krabbefesten i teltet ved Halsnøy Senter på fredagskveld, og dans i det same teltet avsluttar den solide veka i Sæbøvik.

– Perlo har iallfall vist seg frå si beste side. Alt me gjer her ved kulturhuset er dugnadsdrift som går til inntekt til huset. Dette er hovudinntektskjelda til velforeininga til huset, sjølv om me har andre arrangement gjennom året også. Men me er få i velforeningsstyret, så me treng å ha med mykje anna dugnadsfolk på arrangement som dette, og det får me får me heldigvis med oss, slutta Hvidevold mellom vaffelslaga.