Skjerp øyrene med Vestafor

– Vestafor er ein festival for utforskande musikk. Eg håpar ikkje vi skremmer nokon med det, fordi vi vil gjerne skapa eit fellesskap på konsertane, og visa ei litt anna side av kva Rosendal kan vere, sa styreleiar i Fri Kultur Kvinnherad Christian Meaas Svendsen til Grenda om festivalen i fjor.

Sosial og fin festival

Gjennom organisasjonen Fri Kultur Kvinnherad arrangerer altså Meaas Svendsen festivalen for andre år på rad. I fjor kunne han fortelja at det heile gjekk fint for seg, men at han kunne ynskja seg litt meir publikum.

I år vil festivalen ha eit nytt tilbod. Sounding Sculpture er ein to dagar lang workshop for barn. Her skal deltakarane byggja ein skulptur av ymse ting, mellom anna materialar med elektromagnetiske eigenskapar. Seinare skal dei spele musikk på denne skulpturen.

Utanom dette byr festivalen på 8 konsertar fordelt på 4 ulike scenar, nærare bestemt Rosendal samfunnshus, Nerhuslåven, Skjethaug og Kvinnherad Kyrkje.

«I løpet av 4 dagar gjestar 30 unike artistar med opphav frå Norge, Sverige, Brasil, Sør-Afrika, Slovakia og Frankrike Rosendal. Dei har mykje å fortelja. Ta deg turen. Lytt. Kan henda det blir vakkert», skriv Fri Kultur Kvinnherad på Facebook.

Program:

Torsdag 9.mai, Rosendal Samfunnshus

Sounding Sculpture workshop for barn

Fredag 10.mai, Rosendal Samfunnshus

Sounding Sculpture workshop for barn og konsert

Sten Sandell & Johannes Nästesjö

PNL Circus

Laurdag 11.mai, Skjethaug og Nerhuslåven

Michaela Antalová og Adrian Myhr

Juliana Venter vs. Mauricio Weimar

Isach Skeidsvoll: «Dance to Summon»

Sundag 12.mai, Kvinnherad Kyrkje

Shan

Helga Myhr «Andsyning»