Skal laga film om hytteliv

Merethe Offerdal Tveit fortel på telefon til Grenda at prosjektet enno er på idéstadiet, men at det blant anna er fenomenet med å eiga ei hytte ho er interessert i å sjå nærare på.

– Kva er eigentleg dette fenomenet, og kva konsekvensar kan det få for lokalsamfunna? spør ho.

Inspirasjon

For fleire år sidan jobba Offerdal Tveit på ein gard i Fåvang i Gudbrandsdalen, og tok mellom anna del i det å mjølka geitene. Nokre år seinare møtte ho gardseigaren igjen, som fortalte at dei hadde mista setra grunna hytteutbygging. Som ein fylgje måtte dei slutta med geiter.

Offerdal Tveit legg ikkje skjul på at denne historia har vore ein viktig del av inspirasjonen hennar for å villa laga ein film om hytteliv.

– Og det er mange slike historiar. Spørsmålet eg då stiller er; kva og kven går hytteutbygginga ut over?

Ho seier at problematikken med hytteliv strekkjer seg lengre enn til utbygginga av dei store hyttefelta i dei mest populære fjellområda. Også i meir kystnære strok kjenner ein til fenomenet gjennom til dømes oppkjøp av feriehus.

– Ein ser ofte at folk med pengar kjøper seg feriehus, noko som pressar prisane opp for dei som vil busetja seg ein stad.

Offerdal Tveit peikar på den kultur- og interessekonflikta, samt maktkampen, som kan oppstå i spennet mellom hytteeigarar og fastbuande. Liknande konfliktar har ho arbeidd med tidlegare òg.

– Filmen "Odelsgut og Fantefølge" handla også om interessekonfliktar, seier ho.

Her handla det om møtet mellom by- og bygdekultur.

Nysgjerrig

Offerdal Tveit understrekar at det er ulike problematikkar og perspektiv å ta tak i, både frå hytteeigarane si side og dei fastbuande. Filmen er ikkje meint som udelt kritikk til hyttelivet.

– Eg skal ikkje laga ein film som hellar mot å velja side, eg er nysgjerrig på fenomenet hytteliv. Dette er noko eg lurer på; kvifor er hytte så viktig for folk? seier ho.

Pengane ho har fått frå Vestnorsk filmsenter skal gå til research, og til å kartleggja kvar problematikken ho vil ta opp er mest aktuell.

– Idé og film blir til undervegs, sluttar Offerdal Tveit.