Skal ha open støl ni gonger i sommar

Tradisjonen tru inviterer Kjeldestøl venelag til opne stølsdagar med kaffi, saft og dei vidgjetne mjelkekakene. I år vert det heile ni slike arrangement; kvar onsdag frå slutten av juni til byrjinga av august, samt to søndagar.

– Desse stølsdagane har vore ein stor suksess heilt frå starten. Både staden og utsikta er viktige grunnar til det, men den aller største årsaka er garantert budeiene. Truleg er budeiene på Kjeldestøl og stølsdagane unike i Norge, skriv Kjeldestøl venelag i ei pressemelding.

Sju sel

Kjeldestøl kom truleg i drift på midten av 1600-talet. Etter at restaureringsarbeidet tok til i 2009, er staden no komplett med sine sju sel. Siriselet har stått der heile tida, medan venelaget har bygd opp att Bjørkesselet, Jensaselet, Monsaselet, Kristiansselet, Peraselet og Torkjellsselet. I tillegg er det sett opp både utedass, ei skytje, ei hadletekkje, eit kalvahus og nokre flotte langbord med benker. Venelaget har elles rydja fleire gamle stiar i området, ikkje minst den flotte Hauavegen, som går frå Kjeldestøl til Nysetre og Hovda.

- Sela står opne, og alle er velkomne til å stikka innom for å få ei oppleving av korleis livet var på Kjeldestøl fram til 1951, som var siste sommar med stølsdrift, opplyser Kjeldestøl venelag.

Frå bommen på Bjørke, ovanfor kyrkja i Rosendal, er det om lag 1 times gange til Kjeldestøl.