Skal feira jubileum for Eid og Husnes kyrkjer

I år er det 200 år sidan Eid kyrkje på Halsnøy og 150 år sidan Husnes kyrkje vart bygt. Dette feirar dei to sokna med ei felles jubileumsveke. Grenda møter sokneprest Åse Selsvold som gjer seg klar for ein dåpssamtale i Eid kyrkje. Ho har tid til å informera oss litt om jubileet.

– Me har hatt ei felles nemnd frå begge sokneråda, både frå Eid og frå Husnes, for å planlegga denne markeringa, fortel ho.

I Husnes kyrkje blir det jubileumsgudsteneste søndag 25. august, der prost i Sunnhordland Svein Arne Theodorsen er med.

– I tillegg har me invitert alle som har vore prestar i Husnes-kyrkja, og nokon av dei skal også bidra i gudstenesta.

Selsvold fortel at det blir ein utvida kyrkjekaffi den dagen, og så lyser ho opp:

– Ja, og så har me jo fått eit lokalt gospelkor no! Dei skal synga på jubileumsgudstenesta vår, så det blir skikkeleg bra!

Koret som Selsvold snakkar om er Get Together - Kvinnherad Gospel. Dette er eit nystarta kor som har øvingar på Valen, og dei har si første framføring på dette jubileet.

Ny bok

Søndagen etter, den 1. september, er det jubileumsgudstjeneste i Eid kyrkje.

– Då kjem biskop Ragnhild Jepsen, sidan det er 200-årsjubileum. Det er litt ekstra stas når biskopen kjem, smiler Selsvold.

– Og så blir det flott jubileumsmiddag på Zoar for inviterte gjester.

I samband med jubileet vert det også arrangert temakveldar med føredrag og boksal. Først ut er temakvelden i Eid kyrkje på Halsnøy tysdag 27. august, medan Husnes kyrkje har sin temakveld torsdagen etter. På temakveldane vil det bli presentert ei ny bok av Lars Jostein Røyrvik, som handlar om historia til dei to kyrkjene.

Artige situasjonar

Presten håpar på godt oppmøte til arrangementet denne veka.

– Me håpar jo at folk vil koma. Det kan vera kjekt å bli bevisst bakgrunnen til kyrkjene våre, og så får dei høyra mange løygne historier. Det er mange artige situasjonar som oppstår når kyrkjer skal byggjast, skjønar du, seier Åse Selsvold med eit lurt smil.