Rosendal kultur presenterer neste artist
No er det klart kven som skal følgja opp suksessen med Daniel Kvammen. Og det er ikkje nokon kven som helst.
Publisert
Søndag gjennomførde den nye organisasjonen Rosendal kultur sitt fyrste arrangement. Då kom Geilo-musikaren Daniel Kvammen til Gurinefjæro for å halda to konsertar. I forkant av den fyrste, røpa leiar i Rosendal kultur, Ingve Hesjedal, kven som blir neste artist. Fredag 31. januar kjem Thom Hell til Gurinefjæro for å halda intimkonsert.
«Thom Hell har gjennom ei årrekkje vore ein av Norges mest populære og produktive artistar. Som songar, produsent og låtskrivar har han gitt ut 12 studioalbum, motteke tre Spellemannprisar, sjarmert heile Norge i «Hver gang vi møtes», og vunne «Det store korslaget». Hans plate «Happy Rabbit» vart motteke med ståande ovasjonar av britisk presse. I 2019 gav han ut tre album, i 2022 gav han ut to, og i 2023 gav han ut eit dobbeltalbum - alle mottok strålande kritikkar», står det i eit presseskriv om 48-åringen frå Kristiansand.
Annonse
Suksessfulle samarbeid
Thom Hell, eller Thomas Helland som han eigentleg heiter, har ein lang og innhaldsrik karriere bak seg, og har gjennom åra blitt ein velkjent og godt likt artist. Ved sida av eigne utgjevingar, har han medverka på ei rekke suksessfulle samarbeid, mellom anna med artistar som Marit Larsen, Jonas Fjeld, Marion Ravn, Jonas Alaska, Marte Wulff og Larkin Poe.
«Thom hentar mykje inspirasjon frå 60- og 70-talet, og utifrå denne forankringa har han jobba fram eit særeige og vellydande musikalsk uttrykk», heiter det.
Besøket i Rosendal passar tidsmessigt perfekt, for Thom Hell kjem med ny plate i januar. Med sitt 13. album, feirar han også sitt 20. år som artist. Over nyttår skal han ut på ein omfattande turné. Det skjer i eit duoformat i lag med Ronny Yttrehus på gitar.
