Rosendal fekk eiga lysgate
Sundag var det familiedag og lysgatetenning i Steinparken.
Publisert
Sist oppdatert
Bak arrangementet stod RosendalStiftinga, Steinparkens venner og Rosendal bygdalag. Det var mange som møtte fram på familiedagen, og små og store koste seg, kan leiar i bygdalaget, Solveig Hus Hansen fortelja.
– Mange laga seg fuglebrett, høyrde på eventyrstund eller kosa seg med kaker, bollar, brus og kaffi i Dinosaurhuset, skriv ho i ein e-post til Grenda.
Annonse
Klokka 16 tende dei lysgata i Steinparken, som nok kjem til å gleda store og små i lang tid framover.
– Vi vart inspirerte av mellom anna lysgata i Herøysund, og ville laga ein i Rosendal også. I siste liten sendte vi inn ein søknad til Sparebank1-stiftinga, og fekk summen vi søkte om. Det er vi takksame for, skriv Hus Hansen.
Då dei skulle velja seg ei lyslenke, gjekk dei for ein med meir kvalitet og den kosta litt meir enn dei hadde sett for seg.
– Då tok vi ein telefon til Kjetil Helvik i Kvinnherad Elektro, og han var positiv og raus og dekka den resterande summen, skriv Hus Hansen vidare.
