Romjulsfest i Kvinnherad Arena: – Kjekt å sjå gjensynsgleda
Det var stor suksess då IL Trio inviterte til fest og konsert i Kvinnherad Arena andre juledag. Trio vil skapa ein møteplass for alle kvinnheringar, og trekte folk frå alle deler av kommunen.
I år som i fjor arrangerte Trio ein stor romjulsfest for alle i heile kommunen. Hiphop-duoen Kriminell Kunst kom opp frå Stavanger for å spela konsert for dei frammøtte. Rapparane lukkast i å laga skikkeleg feststemning i Kvinnherad Arena.
– Det var Daidalos Dahle som fekk booka inn Kriminell Kunst. Musikarane var svært nøgde med publikum, og håpa å få koma tilbake ein annan gong, seier Eskil Moen i IL Trio.
Annonse
Godt konsept
Rap-duoen hadde først ein konsert med eigen musikk. Resten av kvelden var dei DJ’ar og sytte for god festmusikk av alle sjangrar.
– Det konseptet deira fungerer veldig bra. Det gjer at me får litt forskjellig musikk som alle kan lika, heile kvelden, til ein pris me kan ha råd til, forklarar Moen.
Trio fekk selt 600 billettar til arrangementet. Dei hadde i utgangspunktet tenkt ein kapasitet på 1000 publikummarar, så det var god plass i hallen. Det gav likevel eit godt overskot for idrettslaget, sjølv om Eskil Moen ikkje har heilt oversikt over det enno.
Annonse
– Eg har framleis alkohol ståande i garasjen som skal sendast tilbake, så det spørs litt kor mykje me får for det, men eg veit at det i alle fall vert meir enn den samla summen me får frå foreldrebetaling elles i året.
Kjøp bussbilletten tidlegare
Moen fortel vidare at det var ein svært kjekk kveld for både publikum og frivillige.
– Det var strålande greier! Det var spesielt kjekt å sjå all gjensynsgleda mellom folk som er heime til jul og ikkje har sett kvarandre på lenge.
Arrangementet har også fått skryt frå politi og skjenkekontroll. I alt 96 frivillige bidrog til ein svært vellukka kveld, og Eskil Moen fullroser både dei og samarbeidspartnarar som bidreg til kvelden.
– Dei frivillige gjer ein kjempejobb, og dei eg har snakka med syntest det var ein morosam dugnad. I tillegg hadde me eit godt samarbeid med både Tide, Toma, Pizzabakeren, kommunen, politiet og vakthald frå PSS.
Annonse
Moen håpar at romjulsfesten kan vera ein fast møteplass på andre juledag, der «alle» kan treffa kvarandre. Han er glad for at arrangementet trekkjer folk frå heile kommunen, men kjem med ei oppfordring til eit eventuelt arrangement neste år:
– Det var 70 personar som trong nattbuss til Rosendal, og me fylte òg opp bussen til Sæbøvik og til Utåker. Neste gong håpar eg at alle bestiller bussbillett når dei kjøper konsertbilletten, sånn at me veit kor mange bussar som faktisk trengs.
