Romandebuterer og byr på bokbad

– Det er skrekkblanda fryd å gje ut bok. Det er litt skummelt å visa fram det ein har jobba med aleine så lenge. Ein stiller seg litt for hogg og litt naken. Når boka er ute, så er ho slik ho er. No har eg null kontroll på kva liv ho kjem til å leva, seier Kristin Schulerud i samband med at ho er klar med boka «Tynn hinne».

Tredje boka

Dette er tredje boka hennar. 65-åringen har gitt ut to diktbøker før, «Eg vil dansa deg i møte» og «Hender».

– Dei som har peiling kallar det ein punktroman, som ein stad mellom novelle og roman. Det krev litt av lesaren, for eg hoppar litt att og fram i tid, og det ligg ulike lag her. Eg hadde tenkt å skriva det som noveller, men det skjedde noko med hovudpersonen etter kvart som eg skreiv, og dermed blei det ein roman, seier forfattaren sjølv om boka.

I korte trekk ser hovudpersonen Solrunn tilbake på livet sitt for å prøva å forstå kvifor ho har dei utfordringane ho har i livet sitt som vaksen kvinne.

– Ho har utfordringar med sosiale relasjonar, kjønnsroller, seksualitet og religion, og prøver å finna ut kvifor ho møter desse utfordringane på den måten ho gjer, forklarer Kristin Schulerud.

Bokbad

Boka er illustrert av Karin Bøe, og vert også gjenstand for eit bokbad i biblioteket 18. mars.

– Det blir musikk, opplesing, litt bilete og så blir det ein samtale mellom meg og Åse Myklebust Neset. Korkje eg eller Åse har gjort dette før, smiler Schulerud.

Skrivinga har ho gjort fleire stader, både heime og på verkstaden hennar i Guddalshuset.

– I starten er det veldig open og intuitiv skriving, og då skjer det ofte då eg minst ventar det, når eg ikkje skal noko anna, som til dømes når eg er på reise. Boka er eit konglomerat av personar eg har møtt, kjent og hatt samtalar med, forklarer Kristin.

Kvinnedagen er tett på når Grenda snakkar med Schulerud og Bøe, og tematikken som prega årets 8. mars har sin plass i «Tynn hinne» også.

– Det er mange kvinner som ikkje har det bra i dag også, med partnarvald og valdtekt som to eksempel. Nokre menneske trur dei kan invadera andre menneske fysisk og psykisk, og etterpå gje den andre skulda for det, seier forfattaren, og fører samtalen inn på eit tema som ho går inn på i boka.

– I kor stor grad styrer genane våre oss i dag? Mange kvinner har lett for å underordna oss, lett for å ta på oss skuld og føla på skam og dårleg samvit. Kan noko av det liggja i genane? Det stiller i alle fall hovudpersonen spørsmål ved, seier Schulerud

– Ting har gått betre for kvinner ei stund, men no er det på veg tilbake, meiner Karin Bøe.

Valt ut illustrasjonar

Bøe sine illustrasjonar er ein vesentleg del av uttrykket til romanen.

– Eg er veldig nøgd med dei. Det er nydelege bilete, og omslaget er tydeleg på kva det dreier seg om. Karin er så flink til å fanga stemning og innhald i bileta sine. Dei er utruleg godt laga, og støttar oppunder innhaldet, seier Schulerud.

– Eg har ikkje lest heile boka, men delar av ho. Eg har visst kva ho har ønska, og laga opp fleire illustrasjonar, og så har Kristin valt kva ho ville bruka, forklarer Karin, som også har verkstaden sin i Guddalshuset.

Av den grunn har dei hatt korte kommunikasjonslinjer mellom forfattar og illustratør. Forutan Bøe sine illustrasjonar, er det éin barneteikning med, som skulle vera frå barnerommet til hovudpersonen. Den er laga av Henrik Elias Dahl.

Romanen er gitt ut av forlaget Skriveakademiet. Schulerud er tydeleg på at ho hadde aldri våga å gje ho ut utan deira redaktørhjelp og forlagsstøtte.

– Andre har hobbyar og interesser dei brukar pengar på. Eg investerer i å gje ut bok for min eigen, sluttar forfattaren.