Raudlista fuglar og jordfargar i galleriet

– Dette er ikkje Norge, dette er Italia!

Orda tilhøyrer malaren Bernt Erik Myrvoll, og var han respons då NRK-veteranen Ole Torp spurde om korleis han første møte med Rosendal og Baroniet var.

– Me var på ein av dei årlege campingturane på Vestlandet med foreldra mine, og kom til Rosendal og Baroniet. Det var skjelsetjande for eit barn, sa sunnmøringen om besøket i det pompeianske rommet i baroniet, som han påstod han hadde blitt jaga ut frå for over 35 år sidan.

Fugleaktivist

Anledninga for utsegna var opninga av sesongens andre utstilling i Galleri G Guddal, der Karin Augusta Nogva har utstilling saman med Bent Erik Myrvoll. Ole Torp, velkjent for fleirtalet av dei frammøtte på opninga, losa både kunstnarar og publikum gjennom verka på veggen, tanken bak og filosofien til dei to Ålesund-baserte kunstnarane.

Forholdet til Rosendal var det første temaet Torp tok tak i

– Karin, tapetet ditt der borte er på ein rar måte i slekt til baroniet?

– Ja, det er trykka på tapetet med preging, som eg blei inspirert til etter eit besøk i Baroniet, vedgjekk ho, og allereie der hadde ho knytt band til publikum.

Utstillinga til dei to sunnmøringane rommar eit spenn i kunsten frå fugletrkk og japanske kampdrakter til fargeskalaar og fresker.

– Det er tydeleg skilnad på kva som tilhøyrer kven av kunstnarane. Men sjølv om de er ulike så samarbeider dykk. Begge er også veldig opptatte av natur, sa Torp, og påpeika at

Karen Augusta Nogve er ein forrykande aktivist på fuglane sine vegner.

– Du lagar grafikk av utryddingstruga norske fuglar. Sei noko om denne interessa for natur og fugl!

– Eg er oppvaksen i havgapet, men det er først som vaksen eg forstod at eg har ein fuglekunnskap med meg frå oppveksten. Lydbiletet og fuglesongen er endra frå då eg var lita, meinte ho medan Torp peika på portretta av dei utryddingstruga artane vipe, brushane og songlerke som no heng på guddalsveggane.

Utryddingstruga

Myrvoll på si side viste fram dei ulike pigmenta han finn i Norge, og sa litt om korleis han laga til fargestoff ut av norsk jordsmonn. Fargeskalaane som han har utstilt i Galleri G Guddal er produkt av fargar Myrvoll har utvunne frå norsk jordsmonn, saman med freskane.

– Me byggjer ned norsk natur i større tempo enn nokon gong. Er kunst ein måte å påpeika dette? undra Torp.

– Ja, me må prøva å ta oppgåva på alvor når noko forverrar seg, svarte Nogva.

Ho skulle seinare på torsdagen ikle seg raudt kostyme og ta på seg rolla som Fuglevaktaren, og gjennomførte ein perfomance i kafeen i Guddalstunet som inkluderte opplesing av dei over 90 norske fugleartane som no er utryddingstruga.

Gallerist Gøril Guddal koste seg med samtalen Torp hadde med Myrvoll og Nogva føre eit publikum på 60-70 i talet.

– Det var kjekt, lærerikt og spennande å høyra på. Dei er ulike kunstnarar, med ulike arbeidsmetodar, vurderte ho.