Praktikar og estetikar, aristokrat og demokrat
Laurdag 2.september kan ein ta turen til Riddersalen for å høyre den spennande historia om mannen som var stamhusbesitter på Baroniet Rosendal frå 1838 til 1896.
Publisert
«Marcus Gerhard Hoff Rosenkrone (1823-1896) var mannen som bygde Avlsgarden, dreiv Rosendalskulen for skuleflinke gutar frå heile Kvinnherad, og skapte den heilt unike romantiske landskapsparken» skriv programansvarleg Herborg Kråkevik i ei pressemelding.
Marcus Gerhard var stamhusbesittar frå han var 15 år gammal til han døydde 73 år gammal. I pressemeldinga vart han skildra som ein praktikar og estetikar, aristokrat og demokrat, fortidsromantikar og framtidspioner, og bjørnejeger.
Annonse
Professor i rettshistorie Jørn Øyrehagen Sunde, som er oppvaksen i Kvinnherad kjem til dette jubileumsseminaret for å fortelja historien om Marcus Gerhard.
«Øyrehagen Sunde er sjølv «ein skuleflink gut frå Kvinnherad» som truleg ville nydt godt av den skulen Marcus Gerhard dreiv på Avlsgården», skriv Kråkevik vidare.
Med seg har Øyrehagen Sunde kunsthistorikar Gunnar Danbolt, som fortel om Marcus Gerhard si store målerisamling. Han vil spesielt fokusera på dei såkalla «Düsseldorferane», og Marcus Gerhard sitt venskap med desse.
«Düsseldorferane var målarar med tilknytning til det som var den viktigaste kunstutdanninga i Europa på denne tida: Düsseldorfskulen. Dei som har vore inne på Rosendal slott og sett nokre av måleria, hugsar kanskje Hans Gude sitt store høgfjellsmotiv i Den røde sal, eller måleriet av Malmangernuten med slottet i forgrunnen, eller Anders Askvold sitt måleri av same motiv. Eller eitt av dei vakre Morten Müller måleria. Alle desse tre var såkalla «Düsseldorferar», skriv Kråkevik.
Annonse
Ulf Holmene frå Riksantikvaren har hatt det faglege ansvaret for Rosendal Slott, med alle bygningane og den tredelte Rosendal Have. Han kjem for å fortelja om Marcus Gerhard sitt Rosendal.
«Eit høgdepunkt frå romantikkens tidsalder i Noreg. Her vil han koma inn på korleis den kjære landskapsparken som me alle kan gå i i dag vart til, og kva tankar i tida som inspirerte Marcus Gerhard til å skapa denne parken», heiter det i pressemeldinga.
Som om dette ikkje var nok, kjem også to av dei fremste norske klassiske musikarane, Ingrid Andsnes og Frida Fredrikke Waaler Wærvågaen. Dei spelar musikk av Grieg, Ole Bull, Halfdan Kjærulf og Christian Sindig, musikk som omgav Marcus Gerhard og menneske i hans samtid.
