Populær forfattar vitja biblioteket

Boka kom ut i august, og er Renberg si 32. bok sidan debuten i 1995. I motsetning til dei andre bøkene, er denne ein historisk roman.

Renberg sat eigentleg og studerte rettsmedisin for ei anna bok han skreiv på, då ordet «lungeflyteprøven» dukka opp i eit dokument.

«Fødselen til moderne rettsmedisin pleier vi datera til året 1681, då ein lege for fyrste gong brukte lungeflyteprøven og redda livet til ei 15 år gammal jente», sto det i dokumentet.

– Og då tenkte eg «kva i alle dagar er dette?». Etter litt graving fann eg ut at det ikkje var laga verken bøker eller filmar om dette. Og det innehaldt på ein måte fødselen til vår tid også, og då vart eg hekta på kroken, det var ingen veg tilbake, fortalde Renberg til Grenda etter føredraget.

Lungeflyteprøven

Lungeflyteprøven viste seg å vera ein prosess der ein tek ein bit av lungene til eit spedbarn og legg det i vatn. Då vil ein av to ting skje; enten flyt biten eller så søkk den. Flyt biten betyr det at den er porøs og levande, og at luft har passert gjennom den. Ergo at spedbarnet på eit tidspunkt har pusta.

«Hun het Anna Voigt, og hun levde for veldig lenge siden; men bare kort». Slik startar den nye boka til Renberg, som handlar om ei 15 år gammal jente som budde i Tyskland på 1600-talet. Hennar historie var unik berre på eit punkt; ho var godseigardotter.

I Tyskland på denne tida var det ein lov som sa at kvinner som har fødd eit levande barn for så å drepa det, noko som skjedde ofte på den tida, vart vanlegvis gravlagt levande og spidda.

– På denne tida var det lite som skulle til for å hamne i gapestokken, og å bringa skam over familien var ein av dei verste tinga ein kunne gjere. Å føda eit barn utanfor ekteskap var ein av desse tinga, og ingen ville vedkjenna seg verken deg eller familien din om dette skjedde, fortalde Renberg.

Fleire kvinner valde å drepa sine uekte barn, ved å kvela dei med ei pute eller drukna dei i elva. Mange vart arresterte og sett for retten, ofte utan bevis for at dette hadde skjedd, for å svara for sine handlingar.

– Anna Voigt var ei av desse kvinnene. Det unike i hennar historie er at ho var dotter av ein godseigar, og faren hadde pengar til å tilkalla ein advokat.

Dikta og ekte

Lungeflyteprøven er ei bok basert på Anna si ekte historie. Renberg har tatt seg fridomen til å utvikla karakterane i boka, men resten er henta frå historiske dokument.

– Eg har absolutt ikkje kalla det «true crime» for det er det ikkje, men det er basert på ein sann historie. Eg har dikta tusen ting fordi eg veit ikkje korleis folk var eller tedde seg, men for fyrste gong i mitt liv hadde eg ei heilt konkret historisk kriminalsak som hadde det lille ekstra med seg og faktisk var med å endra historia, sa Renberg.

Renberg var ein energisk og morosam førelesar til tross for det alvorlege temaet han snakka om. Han viste bilete av sin tur til Tyskland der han fann godset Anna Voigt voks opp på, og tinghuset der rettssaka hennar gjekk føre seg.

Etter førelesninga signerte han bøker til alle og ein kvar, og fekk til og med lest opp eit dikt frå Arne Torget.