Pinnsvinsafari

Det heile starta fordi Mats oppdaga fleire piggsvin i hagen i Omvikdalen i forfjor. Han tok nokre bilete og sendte til vener, og dei oppmuntra til vidare deling.

– Det var ein som sa at eg burde laga ein Instagram, og det gjorde eg. Det byrja litt på tull, men det viste seg at folk syntes det var gøy, og eg fekk ein del følgjarar, seier Mats.

Tok litt av

Responsen gjorde at Mats la ut endå fleire bilete, og oppmoda følgjarane om å senda inn eigne bilete.

– Om sommaren får eg tilsendt piggsvin-bilete dagleg, eg hadde aldri førestilt meg at det skulle vera så stor interesse for bilete av piggsvin. Det tok litt av, men det er veldig gøy med piggsvinbonanza om sommaren, seier han.

Variert CV

Mats hadde ikkje noko særlig forhold til det vesle pattedyret frå før av, utan om at han såg dei rundt i hagen, men no har han knytt eit noko djupare band.

– Dei er jo veldig fine og morosame dyr. No assosierer mange av venene mine meg med piggsvin òg, så eg er visst blitt «han der piggsvinfyren», ler Mats før han legg til;

– Eg veit ikkje heilt kva eg skal skrive på CV-en framover; gitarist eller piggsvinfyr.

I haust skal Mats byrje i ny jobb som gitarlærar på kulturskulen i Sauda, men han har ingen planar om å gje seg med piggsvin med da fyrste. Han vil dela bilete så lenge han får dei tilsendt.

– Piggsvin er jo ein litt sesongbasert interesse, men eg tenkjer at eg skal legge ut litt innimellom i lågsesongen òg. Kanskje eg kan informera om korleis ein tek vare på og hjelper dei, samt nokre bilete frå arkivet, seier han.